Albatta, "Manchester Yunayted"ning bir qator futbolchilari xatolar qildi, murabbiy ham, taktika ham, reja ham ishlamadi, ammo ishning ruhiy tomoni ham bor.

«MYU» dastlabki gollarni o‘tkazgan sayin, tezroq javob berishga urinaverdi, intizomni unutdi - «Liverpul» esa, bunday shartlarda eng yaxshisi.

Qaysidir ma’noda, Braziliyaning Germaniyaga qarshi yarimfinalini eslatib yubordi. O‘yin Rioda, g‘alaba kerak, gol o‘tkazgan sayin, Braziliya oldinga tashlanavergan, hatto bir vaziyatda maydon markazidan o‘yinni boshlagan Marselo bir o‘zi raqib futbolchilarini aldab, yurish qilgandi - ya’ni hatto buni qanday amalga oshirish kerakligini o‘ylab ko‘rmay, tezroq gol urmoqchi bo‘lib, og‘ir jazolangandi.

Bu o‘yin unutilmaydi, doim  eslatiladi, to‘g‘ri, ammo uch ochko yo‘qotildi xolos. Eng muhim sinov ten Xag bu holatdan shogirdlarini olib chiqishida. Ya’ni bir o‘yinda kuzatilgan ruhiy holat bir nechta uchrashuvga cho‘zilib ketishi mumkin. Masalan, keyingi o‘yin «Betis» bilan, keyin «Sauthempton», jamoa bugungi natijadan tezroq chiqib ketish uchun yana shoshilishi, oldinga tashlanishi va jazolanishi mumkin. Asosiy sinov mana shunda. Sovuqqonlik rejimiga qaytishda. Ko‘ramiz.

«Liverpul» esa, bu tarixiy g‘alabadan so‘ng, to‘rtlikka kirish yo‘lidagi favoritga aylandi. Yo‘qotilgan ochkolar bo‘yicha «Tottenhem» bilan teng, «Nyukasl»dan atigi 2 ochko orqada. Hech narsamas.

Qahramon Aslanov.