Албатта, "Манчестер Юнайтед"нинг бир қатор футболчилари хатолар қилди, мураббий ҳам, тактика ҳам, режа ҳам ишламади, аммо ишнинг руҳий томони ҳам бор.

«МЮ» дастлабки голларни ўтказган сайин, тезроқ жавоб беришга уринаверди, интизомни унутди - «Ливерпуль» эса, бундай шартларда энг яхшиси.

Қайсидир маънода, Бразилиянинг Германияга қарши яримфиналини эслатиб юборди. Ўйин Риода, ғалаба керак, гол ўтказган сайин, Бразилия олдинга ташланаверган, ҳатто бир вазиятда майдон марказидан ўйинни бошлаган Марсело бир ўзи рақиб футболчиларини алдаб, юриш қилганди - яъни ҳатто буни қандай амалга ошириш кераклигини ўйлаб кўрмай, тезроқ гол урмоқчи бўлиб, оғир жазоланганди.

Бу ўйин унутилмайди, доим  эслатилади, тўғри, аммо уч очко йўқотилди холос. Энг муҳим синов тен Хаг бу ҳолатдан шогирдларини олиб чиқишида. Яъни бир ўйинда кузатилган руҳий ҳолат бир нечта учрашувга чўзилиб кетиши мумкин. Масалан, кейинги ўйин «Бетис» билан, кейин «Саутҳэмптон», жамоа бугунги натижадан тезроқ чиқиб кетиш учун яна шошилиши, олдинга ташланиши ва жазоланиши мумкин. Асосий синов мана шунда. Совуққонлик режимига қайтишда. Кўрамиз.

«Ливерпуль» эса, бу тарихий ғалабадан сўнг, тўртликка кириш йўлидаги фаворитга айланди. Йўқотилган очколар бўйича «Тоттенҳэм» билан тенг, «Ньюкасл»дан атиги 2 очко орқада. Ҳеч нарсамас.

Қаҳрамон Асланов.