Angliyaning "Manchester Siti" klubi Angliya Premyer-ligasining joriy mavsumida ochko yo‘qotishi yoki qoidabuzarliklar isbotlansa, Chempionshipga tushib ketishi ham mumkin.

Angliya chempionati rahbariyatiga ko‘ra, 2009/10 yilgi mavsumdan beri "Manchester Siti" muntazam ravishda moliyaviy qoidalarga rioya qilmay kelmoqda, shu sababli o‘shandan beri yuzdan ortiq qoidabuzarliklar to‘plangan.

Turli manbalarga ko‘ra, bunday qonunbuzarliklar uchun da’vo muddati yo‘q. Shunday ekan, agar klubning aybi isbotlansa, Premyer-liganing joriy turnir jadvalidagi ba’zi ochkolar undan olib qo‘yilishi yoki hatto keyingi mavsum uchun Chempionshipga tushirib yuborilishi mumkin.

"Shaharliklar" rahbariyati hozircha bu borada rasmiy izoh bermagan, biroq OAVda aytilishicha, ular klub huquqlarini oxirigacha himoya qiladi.

Eslatib o‘tamiz, avvalroq Turinning "Yuventus" klubi A Seriyaning joriy mavsumida moliyaviy firibgarlik tufayli 15 ochko yo‘qotib, turnir jadvalining o‘rtasiga tushib qolgandi. Keyinchalik Italiya klubida jazoni kuchaytirishi mumkin bo‘lgan yangi holatlar paydo bo‘ldi.