Англиянинг "Манчестер Сити" клуби Англия Премьер-лигасининг жорий мавсумида очко йўқотиши ёки қоидабузарликлар исботланса, Чемпионшипга тушиб кетиши ҳам мумкин.
Англия чемпионати раҳбариятига кўра, 2009/10 йилги мавсумдан бери "Манчестер Сити" мунтазам равишда молиявий қоидаларга риоя қилмай келмоқда, шу сабабли ўшандан бери юздан ортиқ қоидабузарликлар тўпланган.
Турли манбаларга кўра, бундай қонунбузарликлар учун даъво муддати йўқ. Шундай экан, агар клубнинг айби исботланса, Премьер-лиганинг жорий турнир жадвалидаги баъзи очколар ундан олиб қўйилиши ёки ҳатто кейинги мавсум учун Чемпионшипга тушириб юборилиши мумкин.
"Шаҳарликлар" раҳбарияти ҳозирча бу борада расмий изоҳ бермаган, бироқ ОАВда айтилишича, улар клуб ҳуқуқларини охиригача ҳимоя қилади.
Эслатиб ўтамиз, аввалроқ Туриннинг "Ювентус" клуби А Сериянинг жорий мавсумида молиявий фирибгарлик туфайли 15 очко йўқотиб, турнир жадвалининг ўртасига тушиб қолганди. Кейинчалик Италия клубида жазони кучайтириши мумкин бўлган янги ҳолатлар пайдо бўлди.
