Andijon viloyati hokimi topshirig‘i bilan maxsus yig‘ilish o‘tkazildi. Unda Andijon viloyati futbol assosiasiyasi 1-vise-prezidenti Bekzod Karimov, “Andijon” klubi bosh direktori Ulug‘bek Mirzayev, Andijon viloyati moliya boshqarmasi rahbari Sardor Rahmonov, Andijon viloyati g‘aznachilik boshlig‘i Baxtiyor Umarov, “Bobur Arena” stadioni mulkdori hisoblanmish Andijon viloyati olimpiya va paralimpiya sport turlariga sportchilarni tayyorlash markazi direktori Dilshodbek Rahimov, ushbu markaz bosh buxgalteri Halilulloh Lochinbekov hamda maydon chimini va projektorni yangilash bo‘yicha ta’mirlash ishlarini olib borayotgan pudratchi korxona menejeri Yahyo Toshtemirov qatnashdilar.

“Andijon” klubining Superliga 1-turida mehmonda “Nasaf” ustidan qozongan g‘alabasidan so‘ng muxlislar tomonidan hatto viloyat rahbarigacha takliflar kelib tushmoqda. Ya’ni, “Andijon” jamoasini tezroq o‘z maydoniga qaytarish va bu orqali natijalarning yanada salmoqliroq bo‘lishi inobatga olinib, viloyat hokimi topshiriq berdi.

Unga ko‘ra, ishlarni yanada jadallashtirish bo‘yicha oldinga siljish kuzatilyapti. Yechimini kutayotgan masalalar muhokama etildi.

Ta’mirlash ishlarini tezlashtirish bo‘yicha yangi rejalar ko‘rib chiqildi. Shu masala bo‘yicha ishchi guruh yana faol ish yo‘nalishini olib bormoqda.

Demak, “Andijon” jamoasining o‘z uy arenasiga qaytish masalasi yanada tezlashadigan bo‘ldi.

“Andijon” matbuot xizmati.