Ispaniya hakamlar qo‘mitasi vise-prezidenti 2020 yilda “Barselona”ga VAR tizimida yordam berishni taklif qilgan.

Avvalroq kataloniyaliklar 2016 yildan 2018 yilga qadar RFEF texnik hakamlar qo‘mitasi sobiq vise-prezidenti Xose Mariya Enrikes Negreyraga 1,4 million yevro o‘tkazgani xabar qilingandi. Klub bu bo‘yicha bayonot bergan va Futbol federasiyasi amaldoriga yosh futbolchilar va hakamlar haqidagi hisobotlari uchun to‘lov amalga oshirilganini ta’kidlagandi. Shundan so‘ng “Barselona” 2003 yildan beri Negreyraga 4,7 million yevro to‘lagani aniqlandi.

Marca nashri “Negreyra ishi” borasidagi ma’lumotlarni chop etishda davom etmoqda. Yangi ma’lumotlarga ko‘ra mansabdor kataloniyaliklarga VAR tizimida yordam berish taklifini bergan. Gap klub Negreyraga to‘lovlar qilishni to‘xtatgan davr haqida ketmoqda.

“Sizga VAR’da yordam beraman. Agar bu qiziq bo‘lsa, men bilan bog‘laning”, — degan Negreyra “ko‘k-anorranglilar” rahbariyatiga.

2019/20 yilgi mavsumda “Real” La Ligada chempion bo‘lgan. Xuddi o‘sha mavsumda “Barselona” VAR bo‘yicha shikoyatlar qoldirgan. “Barselona” Negreyraning taklifini e’tiborsiz qoldirgan.

“Espanyol” “Negreyra ishi” deb atalayotgan voqea yuzasidan turli OAVda chop etilgan ma’lumotlardan xavotirda ekanligi, “Atletiko” esa La Liganing barcha jamoalaridan norozilik va qoralovchi qo‘shma bayonot berishini xohlayotgani ma’lum bo‘lgandi.