Superliganing 2-turida «Metallurg» safarda Namanganning «Navbahor» jamoasiga qarshi bahs olib boradi.

Mazkur jamoalar o‘zaro 52 marta kuch sinashgan: 23 ta o‘yinda «Navbahor», 13 ta uchrashuvda «Metallurg» g‘alaba qozongan, 16 ta bahs durang natija bilan intiho topgan. To‘plar farqi – 73:51, vodiy jamoasi foydasiga.

Namanganda o‘tkazilgan o‘yinlarda to‘liq ustunlik mezbonlar tomonida: 19 ta g‘alaba, 6 ta durang, 1 ta mag‘lubiyat.

Jamoalarning Namanganda o‘tkazilgan so‘nggi beshta uchrashuvi:

21.06.2022.  «Navbahor» – «Metallurg» – 0:0
05.11.2021.  «Navbahor» – «Metallurg» – 1:0
19.10.2020.  «Navbahor» – «Metallurg» – 1:1
19.05.2019.  «Navbahor» – «Metallurg» – 0:0
23.09.2018.  «Navbahor» – «Metallurg» – 0:0

«Navbahor» haqida
«Navbahor» mamlakatimizning kuchli jamoalaridan biri sanaladi: O‘zbekiston chempioni (1996), uch marta O‘zbekiston kubogi sohibi bo‘lgan (1992, 1995, 1998). Bir marta Superkubokni qo‘lga kiritgan (1999). Shuningdek, chempionatlarimizda 1 marta kumush, 8 marta bronza medali bilan taqdirlangan.

Namangan shahrida futbol klubiga 1974 yilda asos solingan bo‘lib, u turli yillarda «Tekstilshik» (1974-80), «Avtomobilist» (1984-87) nomlari bilan yuritilgan. 1981-83 hamda 1988 yildan to hozirgi kungacha «Navbahor» nomi bilan o‘ynab kelayapti.

Jamoaning O‘zbekiston chempionatlaridagi to‘purari Shuhrat Mirxoldirshoyev hisoblanadi. U namanganliklar tarkibida o‘tkazgan 144 o‘yinida raqiblari darvozasiga 127 ta gol kiritgan. U faoliyati davomida jami 222 ta gol kiritib, Gennadiy Krasnitskiy klubi a’zosi bo‘lgan.

«Navbahor» bugungacha O‘zbekiston chempionatlarida 908 ta uchrashuv o‘tkazib, shulardan 421 tasida g‘alaba qozongan. 193 o‘yinda durang qayd etib, 294 uchrashuvda yutqazgan. Kiritilgan va o‘tkazib yuborilgan gollari nisbati 1463:1058. Chempionatdagi eng yirik g‘alabasi – 10:0 (2006 yil, «Xorazm»). Yana bitta e’tiborga molik uchrashuv, bu sermahsul o‘yini – 10:3 (1996, «Kosonsoy»). Eng yirik mag‘lubiyati – 0:7 (2009, «Paxtakor»).