O‘zbekiston Superligasining 2-turidan o‘rin olgan “Navbahor” – “Metallurg” jamoalari o‘rtasidagi uchrashuv arafasida “lochinlar”ning 32 yoshli tajribali darvozaboni va sardori O‘tkir Yusupov bo‘lajak o‘yin haqidagi fikrlari bilan o‘rtoqlashdi.

- Xabaringiz bor, yangi mavsumni g‘alaba bilan boshladik. Bu esa keyingi o‘yinlarda bizga qo‘shimcha kuch hamda motivasiya berishi shubhasiz.

Joriy mavsumning ilk tur bahslari bu yil oson o‘yinlar bo‘lmasligi, barcha jamoalarning kuchi deyarli teng ekanligini isbotladi.

Bunga misol sifatida yurtimizning kuchli klublari hisoblanmish “Paxtakor” hamda “Nasaf”ning ilk turdayoq mag‘lubiyatga uchraganligi, “Navbahor”dan boshqa barcha mezbonlar imkoniyatni boy berganligini keltirish joiz.

“Metallurg”ga qarshi kechadigan bahs keskin va shiddatli kurashlar ostida o‘tishi aniq. Boisi, bekobodliklar ilk turda o‘z maydonida “Neftchi”dan yirik hisobda (0:3) mag‘lubiyatga uchrashdi.

Shuning uchun bo‘lajak bellashuvda “Metallurg” Namanganda ochko olishga intiladi.

Biz – futbolchilar ham bekobodliklar bilan bo‘ladigan o‘yinda g‘alaba qozonib, muxlislarga quvonch ulashishga harakat qilamiz hamda buni amalga oshirish uchun barcha imkoniyatimizni ishga solamiz.

Ishqibozlardan esa jamoamizni bevosita stadionda munosib tarzda qo‘llab-quvvatlab, g‘alabamizga madadkor bo‘lishlarini so‘rab qolaman.

Fursatdan foydalanib, bizga barcha sharoitlarni yaratib berayotgan Namangan viloyati hokimi Shavkat Shokirjanovich Abdurazzoqov, shuningdek, “Navbahor” PFK rahbariyati, jumladan, klub vise-prezidenti Otabek Arifovich Samatovga jamoamiz nomidan o‘z minnatdorchiligimni bildiraman.

Jamoamiz joriy mavsumda o‘zi qatnashadigan barcha musobaqalarda zafar quchishni maqsad qilgan.

Buni amalga oshirish uchun biz – futbolchilar qo‘ldan kelganicha harakat qilamiz.