Xabaringiz bor, “Andijon” futbol klubi fevral oyida Turkiya Superligasida o‘z o‘rniga ega bo‘lgan “Antalyaspor” klubi bilan hamkorlik qilish bo‘yicha shartnoma imzolagandi. Jamoalarning dastlabki uchrashuvi va muzokaralari Antaliya shahrida o‘tkazilganligi bo‘yicha avval xabar berilgandi.
Aytish mumkinki, dastlabki uchrashuvda asosan tomonlarning bir-biri bilan tanishishi, fikrlar almashish jarayonlari bo‘lib o‘tgan. Endilikda klublar hamkorlikni yanada rivojlantirish uchun navbatdagi bosqichga kirishishmoqda. Shu bois javob tashrifi bilan yurtimizga “Antalyaspor” klubi delegasiyasi tashrif buyurmoqda. Ular bugun, 10 mart kuni kechki payt soat 21:20 da to‘g‘ridan-to‘g‘ri Antaliyadan parvoz qiladigan samolyot bilan Toshkentga yetib keladilar va bu yerda 13 martga qadar bo‘ladilar.
Mehmonlar delegasiyasi tarkibi quyidagi mutaxassislardan iborat:
Erdem Erdal (klubning xalqaro munosabatlar va strategik rejalashtirish bo‘yicha menejeri), Adnan Karaxan (klubning bosh skauti), Mexmet Ali Erdal (ommaviy axborot vositalari bilan ishlash departamenti vakili), Mexmet Xakan Onkur ("Fanatik tur" sayyohlik agentligi raisi) va Dog‘uxan Onkur ("Fanatik tur" menejeri). Ularga Toshkentga biroz oldinroq yetib kelgan "Fanatik tur"ning sport direktori Abduhamid Hamidov ham hamrohlik qiladi.
Rejada “Antalyaspor” futbol akademiyasining yurtimizda o‘z filialini ochish masalasi, seleksiya ishlari, “Surxon” – “Andijon” uchrashuviga tashrif, bundan tashqari, “Andijon” jamoasi bilan yaqindan tanishish, U-20 Osiyo chempionati chorak finalidan o‘rin olgan O‘zbekiston hamda Avstraliya terma jamoalari ishtirokidagi o‘yinni kuzatish va “Antalyaspor” seleksiya siyosatiga to‘g‘ri keladigan, potensiali yuqori bo‘lgan o‘zbekistonlik futbolchilarni ko‘zdan kechirish, qolaversa, U-20 Osiyo chempionatining boshqa uchrashuvlarini tomosha qilish ham o‘rin olgan.
"Hamkorlikning keyingi qadamlari sifatida bir-birlari bilan yanada aniq reja va tadbirlar bo‘yicha kelishib oladilar. Bu borada biz yana qo‘shimcha ma’lumot beramiz" - deyiladi "Andijon" futbol klubining rasmiy bayonotida.
