Og‘ir vaznda WBA, WBO va IBF yo‘nalishlari chempioni Aleksandr Usik "Chelsi" klubi va Ukraina terma jamoasi yarim himoyachisi Mixaylo Mudrik haqida o‘z fikrlari bilan o‘rtoqlashdi.
Bokschining fikricha, 22 yoshli yarim himoyachi Oleg Bloxin, Igor Belanov va Andrey Shevchenkolar izidan borishga qodir.
"Menimcha, Mudrik yuz milliondan sal qimmatroq. Men bu yigitni kuzatyapman. Men uni birinchi marta U17 yoki U19 terma jamoalaridagi ishtirokini ko‘rganman. Uning soch turmagi hayratlanarli. Menga Mudrik yoqadi. O‘ylaymanki, bu yigit Ukrainaga to‘rtinchi "Oltin to‘p"ni olib kelishi mumkin", — dedi Usik.
Oxirgi marta ukrainaliklar orasida "Oltin to‘p"ni 2004 yilda "Milan"da o‘ynagan Andrey Shevchenko qo‘lga kiritgan. Mudrik "ko‘klar" safida oltita o‘yin o‘tkazgan, birortasida ham g‘alaba qozonmagan.
Londonning so‘nggi ikki g‘alabasida Potter 22 yoshli ukrainalikni zaxira o‘rindig‘ida qoldirdi. Biroq, keyinchalik murabbiy Mudrikning iqtidoriga muxlislarni ishontirdi va u hali ham yarim himoyachiga ishonishini tan oldi.
