Bugun yurtimizda o‘tayotgan 20 yoshgacha bo‘lgan futbolchilar o‘rtasidagi Osiyo chempionatining ikkinchi yarim finali bo‘lib o‘tdi. Unda O‘zbekiston va Janubiy Koreya termalari to‘qnash keldi. Bahs taqdiri yana penaltilar seriyasida mezbon jamoa foydasiga hal bo‘lgandi. O‘yindan keyin har ikki jamoa ustozlari matbuot anjumanida o‘yin borasida fikrlar bildirib o‘tdi.
Dastlab Koreya Respublikasi yoshlar terma jamoasi bosh murabbiyi Kim Yong Jun umumiy fikrlarini bildirib o‘tdi.
O‘yin haqida nima deya olasiz?
"Avvalo, raqibni irodali g‘alabasi bilan muborakbod etaman. Bugun O‘zbekiston kuchliroq harakat qildi. Biz ham iloji boricha bor kuchimiz bilan o‘ynadik. Ammo omad biz tomonda emasdi.
Biz o‘tgan o‘yindagi kabi almashtirishlarni amalga oshirdik. Bugun futbolchilarimizda charchoq alomatlari sezildi. O‘ylaymanki, har qanday vaziyatda futbolchilarim hurmatga loyiq. Chunki ular maydonga borini tashlab ketishdi".
Bugun penaltilar seriyasida futbolchilaringizga nima bo‘ldi, ularning ruhiy holati yaxshi emasmidi?
"Turnir yoshlarniki va bu tabiiy. Ya’ni bunday yoshda xatolar ko‘p bo‘lishi tabiiy. Boshqa hech qanday izoh yo‘q".
"Bugun jamoangiz yutishi kerak deb o‘ylaysizmi?"
"Hamma o‘yinlarni yutishga harakat qilamiz. Bugun ham bor kuchimiz bilan harakat qildik. Ammo g‘alaba raqib tomonda bo‘ldi".
Bugun jamoangizning qanday yaxshi taraflarni ko‘rdingizgiz? O‘zbeksitondagi sharoitlar haqida nima deya olasiz?
"Biz O‘zbeksitonda yaxshi kutib olindik. Mehmonxonalar va sharoitlar yaxshi edi. Stadionlarning holati ham yomon emas. Biroq, mashg‘ulotlar maydoni haqida bunday deya olmayman. Shunga qaramay, xalqingizning mehmondo‘stligini bizga ma’qul keldi".
Turnir haqida fikrlaringiz?
"Bunday turnirlar, aslida, faqatgina o‘sishga yordam beradi. Uchrashuvlar davomida shuni guvoh bo‘ldikki, futbolchilar katta tajriba va mahoratga ega bo‘lishdi. Jahon chempionatiga chiqqan jamoalar o‘z kuchini namoyish eta olishdi deb o‘ylayman. Biz ham bu qatorda borligimizdan baxtliman. Men to‘g‘ri yo‘ldamiz deb hisoblayman".
Anjumanning ikkinchi qismifa O‘zbekiston yoshlar termasi bosh murabbiyi Ravshan Xaydarov ishtirok etdi. U shunday deydi:
"Avvalo, muxlislar, o‘yinchilar va xalqimizni final bilan tabriklayman. Bugun ikki teng kuchli jamoalar tezkor va shiddatli o‘yin ko‘rsatishdi. Qattiq harakat qilishimizga qaramay, o‘yin penaltilargacha bordi va bunda darvozabonimiz katta mahorat ko‘rsatdi. G‘alaba bizga nasib qilgani adolatliroq bo‘ldi. Yigitlar o‘ziga ishonch bilan harakat qilib, kerakli natija qayd eta olishdi".
Zaxira o‘yinchilarning almashishi o‘zini qanchalik oqladi?
"Ha, futbolchilar o‘yin ritmga kirish borasida ozgina qiynaldi. Ammo ular o‘ziga darrov kela oldi. Har bir futbolchi maqsad bilan tushirilgan edi va ular bildirilgan ishonchni oqladi".
Jarohat olgan futbolchilarni finalda yana maydonga tashlaysizmi?
"Menimcha, katta muammolar mavjud emas. Avvalo, futbolchilar ahvolini bilib olishimiz, ular tibbiy ko‘rikdan o‘tishi lozim. Agar muammo bo‘lmasa, ulardan maksimal foydalanamiz".
Foydalanilmagan vaziyatlar bugun ko‘p edi. Bunga sabab nima?
"Afsuski, zo‘r vaziyatlar qo‘ldan chiqmoqda. Bu muammo, biz uchun. Menimcha, futbolchilarga sovuqqonlik va tajriba yetishmay qolmoqda. Bu borada hali ko‘p ishlashimiz kerak".
Yosh futbolchilarga muxlislar bosimiga turib berish borasida nimalarni uqtirasiz?
"Ha, bu narsa istalgan futbolchi ruhiyatiga bosim yuklaydi. Bilasizmi, biz bu borada alohida nimadir qilmaymiz. Hammasi tajriba bilan keladi. Yosh futbolchilarga chet davlatlar, xususan, Urugvaydagi bahslar bizga nafaqat raqib muxlislariga, balki o‘z muxlislarimizning bosimiga ham chidashni o‘rgatdi. Ekstra-taymlarda, futbolchilar jismonan toliqdi. Ammo muxlislar hissiyotlari bizga g‘alabaga ishonch va quvvat baxsh etdi. Ya’ni, biz bunday muhitdan bosim emas, kuch olishni o‘rganganmiz".
Futbolchilar bugungi o‘yinda katta kuch yo‘qotib qo‘ymadimi, bu narsa finalga qanchalik ta’sir o‘tkazadi?
"Bizda hammasi joyida. Hatto, kiyinish xonasida bayramni to‘xtatib, tiklanish holatiga o‘tdik. O‘ylaymanki, biz bu turnirdagi hech qaysi jamoadan jismonan kuchsiz emasmiz. Ruhiy tomonlama ham. Finalda eng yaxshi o‘yinimizni ko‘rsata olamiz deb o‘ylayman".
ISMATOV J.
