Joriy mavsumda Qozog‘iston chempionatida ishtirok etayotgan Toshkentning «Humo» xokkey pley-off bosqichining yarim finalidan o‘rin olgan Qozog‘istonning «Beybaris» klubiga qarshi uchinchi o‘yinni o‘tkazdi.

Atirau shahridagi kechgan qiyin o‘yinda toshkentliklar g‘alabani ilib ketishdi. O‘yinning 12-daqiqasida Aleksandr Dryagilev hisobni ochgan bo‘lsa, mezbonlar ikkinchi taym boshida muvozanatni tiklashdi.

Taym o‘rtalarida "Humo" bir kishi ko‘p bo‘lib o‘ynash imkoniyatidan unumli foydalanib, ikkinchi golni urdi. Gol muallifi — Vadim Kravchenko. Ikkinchi bo‘lim tugashiga 30 soniya qolganida "Beybaris" hisobni yana tenglashtirdi.

Uchinchi bo‘limda shayba darvozalarga kirmadi va navbat over-taymga berildi. Qo‘shimcha bo‘lim boshida xokkeychimiz Dmitriy Arxipov 2 daqiqaga chetlatildi. Bu vaqtda "Humo" yaxshi himoyalandi va Arxipov muzga qaytgach, jamoamiz hujumkorlikni oshirdi.

Over-taymning 8-daqiqasi boshlangan paytda Pavel Sinyavskiy shaybani raqib darvozasiga joylab, "Humo"ga muhim g‘alabani taqdim etdi.

Shu tariqa, "Humo" seriyada 2:1 hisoibda oldinga o‘tib oldi. Ertaga jamoalar o‘rtasidagi to‘rtinchi o‘yin bo‘lib o‘tadi. Eslatib o‘tamiz, yarim final bahslari jamoalardan biri 4 ta g‘alabani qo‘lga kiritgunga qadar davom etadi.

Xokkey. Qozog‘iston chempionati. Yarim final, 3-o‘yin
"BEYBARIS" - "HUMO" - 2:3 (0:1, 2:1, 0:0, 0:1)
Gollar:
11:58. 0:1 — Aleksandr Dryagilev.
23:42. 1:1 — Aleksandr Vorobyev.
31:34. 1:2 — Vadim Kravchenko.
39:29. 2:2 — Artyom Burdelyov.
67:14. 2:3 — Pavel Sinyavskiy.