"Paxtakor" bosh murabbiyi "Navbahor"ga qarshi bo‘lib o‘tgan o‘yindan keyingi matbuot anjumanida ishtirok etdi.

"Barcha kutganidek haqiqiy derbi bo‘ldi. O‘zining hissiyotlari, gollari bilan. Ilk navbatda biz muxlislar uchun o‘ynaymiz. O‘ylaymanki, ular bizdan rozi bo‘lishdi.

Uch markaziy himoyachi taktikasini "Navbahor"ning kuchliligi uchun tanlamadim. Keyingi o‘yin umuman boshqa taktika va sxema ostida kechishi mumkin. Barchasi futbolchilarning kuchli va zaif jihatlariga, umumiy holatiga bog‘liq bo‘ladi. Har bir uchrashuv uchun strategiya tuzamiz. Kim bilan o‘ynashimizning farqi yo‘q, raqibni to‘liq o‘rganib chiqamiz. Barchasini o‘rganib chiqqan holda raqibga nima taklif qilishimizni va raqiblarning kuchli jihatlarini kuchsizlantirishni reja qilamiz.

O‘ylashimcha, bugun har jihatdan muxlislar yutdi. Ularga yoqadigan o‘yin bo‘ldi. O‘yinda ko‘plab vaziyatlar yaratib, zarbalar berib yakunda mag‘lub bo‘lish ham mumkin. Ammo, asosiysi tablo va navbatdagi uch ochko.

Futbolchilar milliy terma jamoalar yig‘iniga jo‘nab ketishadi. Ular sog‘ va jarohatlarsiz qaytishlariga umid qilamiz.

Sardor Rashidovning zaxiradan maydonga tushirilishi uning jismoniy holati bilan bog‘liq. U yig‘inlarni kechroq boshladi. Terma jamoa yig‘inlaridan boshqa Rashidov bo‘lib qaytishiga umid qilaman.

Mening gaplarimni hurmat qilishingizdan xursandman. Men o‘zim uchun haqman. Hakamlarga baho qo‘ymagan bo‘lardim. Hammaning o‘z vijdoni bor. Barchasini hakamlar qo‘mitasiga qoldiramiz. Ular ushbu o‘yinni tomosha qilishadi. To‘g‘risini aytaman, takroriy lavhalarni ko‘rdim. Menimcha, birinchi penalti yo‘q edi. Ikkinchi penaltida esa jarima maydonchasi ichida futbolchilar ko‘p edi. Nimanidir aniqlash qiyin bo‘ldi. Barchasini qo‘mitaga qoldiramiz", — dedi Shaskix.