Superliga 3-turidan o‘rin olgan «Buxoro» – «Nasaf» (0:1) o‘yinidan so‘ng qarshiliklar ustozi Ro‘ziqul Berdiyev o‘z fikrlarini bildirib o‘tdi.

“Bugun sifatli futbol ko‘rish uchun barchasi mavjud edi, maydon ham, qulay ob-havo ham. Ko‘p vaziyat yaratmadik, gol kiritib, himoyani mustahkam ushlab turdik. Natija uchun o‘ynashga intildik va og‘ir bo‘lgan 3 ochkoni qo‘lga kiritdik. Biz 4 ta rasmiy uchrashuvdan maydonga tushdik, ammo hujumchilarimiz hanuz gol kiritganicha yo‘q. Bu esa meni xavotirga solmoqda. Futbolni 11 kishi o‘ynaydi, standart vaziyatlarda himoyachilar vaziyatlarni golga aylantirishlari kerak bo‘ladi. Yuqoridagi kamchilikni ular orqali yopishga harakat qilyapmiz.

Jamoamizda u qadar katta o‘zgarishlar bo‘lgani yo‘q. Tarkibni saqlab qolishga imkon qadar harakat qildik. Ularni endi yosh deb bo‘lmaydi. Bir necha yillardan buyon to‘p tepib kelishmoqda va tajribalari ham ortgan. 22 yoshli futbolchini yosh desak, bu xato bo‘ladi. Xorijda 17-18 yoshli futbolchi ham yaxshi o‘ynayotganini guvohi bo‘lyapmiz.

«Buxoro» tarkibida Iminovning harakatlari boshqalardan ajralib turibdi. Umuman olganda, jamoa sifatida «Buxoro» yaxshi shakllanibdi”, – dedi Berdiyev.