«Turon» jamoasi bosh murabbiyi Baxtiyor Ashurmatov «Surxon»ga qarshi bahs haqida o‘z fikrlarini bildirib o‘tdi.

“Ikkinchi bo‘limda ustunlikni «Surxon»ga berib qo‘ydik. Vaziyatni o‘nglash uchun o‘zgarishlarni amalga oshirdik, ammo raqib jamoa safidagi liberiyalik hujumchining individual xatti-harakati sabab penalti yuzaga keldi va to‘p o‘tkazib yubordik. Aynan ikkinchi taymda to‘p nazoratini termizliklarga berib qo‘yganligimiz bizga qimmatga tushdi.

1:0 qaltis hisob sanaladi. Shu sabab ikkinchi golni kiritish uchun harakat qilishimiz va pressing qilishimiz lozim edi. Bu ishni 65-daqiqagacha amalga oshira oldik. Barcha jamoalar sekin-asta o‘zlariga kerakli bo‘lgan ochkolarni qo‘lga kiritmoqda. Qayd etilgan durangni qoniqarsiz natija deb baholash mumkin.

Kelgusi turlarda «Bunyodkor» va «Olimpik» bilan kuch sinashamiz. Ushbu bellashuvlar jamoamiz va murabbiylar shtabi uchun muhim ahamiyat kasb etadi. Yomon tarkib yig‘magan edik, ammo omadsizlik va yana boshqa ko‘plab faktorlarni misol qilib keltirish mumkin. Albatta, o‘z maydonimizda «Buxoro» va «Surxon»ni enga olmaganimiz sabab, muxlislar murabbiydan norozi bo‘lishlari tabiiy. Buni to‘g‘ri qabul qilaman, vaziyatni o‘nglashga harakat qilamiz. Yigitlarga ishonaman, ular bugun ham, Qarshidagi bahsda ham borlarini berib harakat qilishdi. Faqatgina «Buxoro» bilan o‘yinimiz chiqmagan edi. Muxlislardan bizni qo‘llab-quvvatlashlarini va sabrli bo‘lishlarini so‘rayman”, – dedi Ashurmatov.