"Fulxem" bosh murabbiyi Mark Silva va hujumchi Aleksandr Mitrovich Angliya kubogi chorak finalida "Manchester Yunayted"ga qarshi o‘yinda ayblanmoqda.

O‘tgan yakshanba kuni "Fulxem" "Old Trafford"da 3:1 hisobida mag‘lubiyatga uchradi va bu o‘yinning burilish nuqtasi 72-daqiqada "Fulxem"ning uch marta chetlatilgani bo‘ldi.

Villian darvoza chizig‘ida to‘pni qo‘l bilan qaytargani uchun, Mitrovich hakam Kris Kavanaga tirsagi bilan zarba bergani uchun, Silva esa nafaqat Kavana, balki to‘rtinchi hakamni ham haqorat qilgani uchun qizil kartochka oldi.

FA tomonidan e’lon qilingan bayonotda Silva maydondan chetlatilganidan keyin to‘rtinchi hakamni haqorat qilishda davom etgan va qo‘shimcha ravishda u tomonga suv idishini uloqtirgan.

Mitrovich esa, Assosiasiya bunday qo‘pol xatti-harakatlar uchun standart diskvalifikasiya "aniq etarli emas"ligini aytadi. 28 yoshli serbiyalik futbolchi jismoniy kuch ishlatishdan tashqari haqoratomuz so‘z ham ishlatgan.

Shuningdek, FA "Fulxem"ni o‘z o‘yinchilari ustidan nazoratni yo‘qotgan klub sifatida aybladi.

Joriy mavsumda "Fulxem" safida barcha musobaqalarda 12 ta gol urgan Mitrovich endi uzoq muddatga diskvalifikaciya qilinish xavfi ostida qolgani aniq. Misol uchun, APL sobiq hakami Mark Xalsi Aleksandrni 10 ta o‘yinga futboldan chetlatishga chaqirdi.