«Rubin»ning sobiq ustozi Eduardo Dokampo avval Qozon klubida to‘p tepgan «Napoli» hujumchisi Xvicha Kvarasxeliya haqida o‘z fikrlari bilan o‘rtoqlashdi.

Mutaxassisning aytishicha, gruziyalik futbolchi Rossiyadagi o‘yinlari davomida faqat futbolga e’tibor qaratgan, bazada yashagan va qo‘shimcha mashg‘ulotlar o‘tkazgan.

«Xvicha maxsus iqtidor sohibimi? Ha, bu darhol sezildi. O‘ylaymanki, u katta o‘yinchiga aylanib, Yevropaga ketadi», - deya Dokamponing so‘zlarini keltiradi Match TV.

Shuningdek, ispaniyalik murabbiy Kvarasxeliyaning rivojlanish darajasi kuchliligi va kelajakda u «Real Madrid»ga o‘tishi mumkinligini ta’kidladi.

22 yoshli futbolchi joriy mavsum «Napoli» safida 30 ta o‘yinda maydonga tushib, 14 ta gol urdi va 16 ta golli uzatmani amalga oshirdi. Transfermarkt portali Gruziya terma jamoasi futbolchisini 85 million yevroga baholamoqda.