“PSJ” hujumchisi Lionel Messi faoliyatini MLS‘da davom ettirishi mumkin.

Avvalroq 35 yoshli argentinalikning MLS‘ga o‘tish ehtimoli 10—20 foizga baholangandi. Devid Bekhem va uning “Inter Mayami” jamoasi JCH—2022 dan buyon Leoning atrofidagilar bilan muloqotda bo‘lib turibdi. Shuningdek, “Inter” Messiga klubning 5 foiz aksiyasini ham va’da qilgan.

Diario Sport nashrining xabariga ko‘ra, Mayami klubi argentinalikni taklif qila olmaydi. Chunki ligada maosh chegarasi yiliga 6 million yevroni tashkil etadi.

Biroq, Amerika ligasi Messini jamoaga taklif qilgan klubga yordam bermoqchi. Klub xo‘jayinlarining yig‘ilishida Leo uchun kurash muhokama qilingan.

Shunday formula o‘ylab topildi: MLS‘ning barcha klublari Messi maoshining bir qismini to‘lab beradi. Qaysi klubga o‘tishni esa 35 yoshli futbolchining o‘zi hal qiladi.

Argentinalik futbolchi MLS‘ga o‘tishi, liganing televizion huquqlari sotuvi oshishiga, shuningdek, JCH—2026 oldidan AQSH futbolining yanada mashhurlashishiga yordam beradi.

Futbolchining o‘zi faoliyatini Yevropada davom ettirishni xohlamoqda. “PSJ” unga yangi shartnoma taklif qilgan, undan tashqari “Barselona” ham Leoni ortga qaytarish imkoniyatini ko‘rib chiqmoqda.