"Chelsi" 2021/22 yilgi mavsumda 100 million funt sterlingdan ko‘proq zarar ko‘rdi. London klubi 2022 yil 30 iyun kuni yakunlangan moliyaviy yilni sarhisob qilar ekan, klubning sobiq xo‘jayini Roman Abramovichga nisbatan qo‘llanilgan sanksiyalar “favqulodda xarajatlarga va foydaning kamayishiga” ta’sir qilganini ma’lum qildi.
"Chelsi" Angliya hukumati tomonidan berilgan maxsus lisenziya asosida faoliyat yuritishi kerak edi. Klub bir qator sohalarda, jumladan, chiptalar, abonementlar va tovarlarni sotish bilan cheklandi va tadbirlar uchun buyurtmalarni qabul qila olmadi, shuningdek, futbolchilar va homiylar bilan shartnoma imzolay olmadi.
Klubga qo‘yilgan cheklovlarga qaramay, daromad 434,9 million funtdan 481,3 million funtga oshdi.Tovar yoki xizmatlarni sotishdan tushgan daromad 177,1 million funtga ko‘tarildi. Klub 2021/22-yilgi mavsumda asosiy jamoa tarkibiga 118 million funt sterling sarmoya kiritdi va o‘yinchilar savdosidan 123,2 million funt sterling ishlab oldi.
Londonliklarning sof zarari 121,3 million funtni tashkil etdi. Bu yilgi yo‘qotish va sanksiyalar tufayli operasion muammolarga qaramay, "Chelsi" UYEFA va Premyer-liganing moliyaviy feyr-pley qoidalariga rioya qilishda davom etishiga ishontirdi.
