"Arsenal"ning yangi davri Arteta tomonidan bunyod qilinmoqda. Yangi jamoa qurar ekan, u klub bilan kelishgan holda bir nechta futbolchilarni jamoadan ketishiga qo‘yib berdi. Ammo o‘sha futbolchilar arzon-garovga kelmagan. 2019 yildan beri Arteta qarorlari sabab klub 300 million yevrolik futbolchilardan ayrildi. Ularning evaziga esa deyarli hech narsa(pul) olmadi. Bu ro‘yxatni tez orada Nikolya Pepe ham to‘ldirishi mumkin. Klub tarixida rekord transfer bo‘lgan Pepe, yozda erkin agent sifatida jamoani tark etishi mumkin. Hujumchi 2019 yilda 72 million funt evaziga xarid qilingandi. Agar Pepe jamoadan ketsa, u holda, "Arsenal"ning futbolchilar borasidagi yo‘qotishlari qiymati 340 milliondan oshadi. Albatta, bunga asosiy sabab Arteta sanaladi. Masalan, Mikel 2019 yildan beri 10 ta futbolchini deyarli tekinga qo‘yib yuborgan.
Mesut O‘zil
2013 yilda 42.5 million funtga xarid qilingan futbolchi, "Arsenal"da yetti yarim yil faoliyat yuritadi. "Real"dan kelgan O‘zil, jamoada tezda muhim figuraga aylangandi. Germaniyalik yarim himoyachining shartnomasi 2021 yilning qishida, muddatidan 6 oy ilgari tugatilgan. O‘zil "Arsenal" bilan 254 ta o‘yinda ishtirok etib, 4 ta kubok yutishda bevosita qatnashdi. U joriy yili mart oyida futboldan ketganini e’lon qilgandi.
Pyer-Emerik Obameyang
2021 yilning dekabrida Obameyangdan sardorlik bog‘ichi olib qo‘yiladi. U oradan bir necha hafta o‘tib, jamoani tark etadi. O‘zil singari, gabonlik hujumchi ham bitimni erta yakunlab, erkin agent sifatida "Barselona"ga yo‘l oladi. Mavsum yakunlangach esa, Obameyang yana APLga qaytdi. Hozir u "Chelsi" bilan.
Aleksandr Lyakazett
Fransuz hujumchisi Aleksandr Lyakazett o‘z do‘sti Obameyangdan olti oy o‘tib, klubdan ketadi. Lyakazett 2017 yilda "Lion"dan 47 million funt evaziga sotib olingandi. U o‘tgan yil yozda erkin agent sifatida jamoani tark etib, yana "Lion"ga yo‘l oldi.
Genrix Mxitaryan
Armaniston terma jamoasi a’zosi "to‘pchilar" safiga "MYU"dan olib kelinadi. Ammo buning evaziga "Arsenal" "qizil iblislar" manziliga Aleksis Sanchesni yuborgandi. Ushbu voqeadan 18 oy o‘tgach, Mxitaryan "Roma"ga ijaraga beriladi. "Arsenal" futbolchi bilan 2020 yilning sentyabrida bitimni muddatidan oldin bekor qiladi.
Shkodran Mustafi
Nemis himoyachisining shartnomasi 2021 yilning fevralida ikki tomonlama kelishuv asosida bekor qilingandi. Mustafi 2016 yilda 35 million funt evaziga sotib olinadi. U "Arsenal" bilan ikkita Angliya kubogini qo‘lga kiritgan va 151 ta o‘yinda maydonga tushgan.
Sokratis
Yana bir tekinga boy berilgan futbolchilardan biri Sokratis Papastatopulosdir. Himoyachi 2021 yilning yanvarida "Arsenal"ni tark etadi. Yunon futbolchisi to‘pchilar safida 69 ta o‘yinda ko‘rinish bergan. 34 yoshli himoyachi ayni damda "Olimpiakos" safida harakat qiladi.
Sead Kolashinas
Kolashinasning bitimi 2022 yilning yanvarida muddatidan avval tugatiladi. Himoyachi "Marsel"ga yo‘l olgandi. Bosniya termasi a’zosi 118 ta o‘yinda "Arsenal"ga yordam bergan. 29 yoshli futbolchi 2017 yilda "Shalke 04"dan sotib olingan edi.
Ektor Belyerin
"Arsenal"ga uzoq vaqt xizmat qilgan futbolchilardan biri Belyerindir. U 2022 yilning sentyabrida jamoani muddatidan oldin tark etgandi. Undan oldingi mavsumni "Real Betis"da o‘tkazgan himoyachi, "Barselona"ga erkin agent sifatida borib qo‘shiladi. Ammo kataloniyaliklar safida unga joy topilmadi va Belyerin "Sporting"ga ijaraga berib yuborildi.
Kalum Cheymbers
Ko‘pfunksiyali himoyachi 2014 yilda "Sautgempton"dan sotib olinadi. Cheymbers yetti yarim yilni klub bilan o‘tkazdi va 2022 yilning yanvarida "Aston Villa"ga erkin agent sifatida yo‘l oldi.
David Luiz
"Chelsi"ni ikkinchi marta tark etgach, braziliyalik himoyachi "Arsenal"ga yo‘l oladi. David Luiz 2019-2021 yillarda to‘pchilar sharafini himoya qilgandi. Ikki mavsum davomida 73 ta bahsda qatnashgan futbolchi, Angliya kubogini qo‘lga kiritadi va mavsum so‘ngida jamoani tark etadi.
ISMATOV J.
