O‘zbekiston U23 terma jamoasi haqida ham shunga o‘xshash fikr bildirish mumkin. Kapadze jamoasi Marokashda Afrika qit’asi termalariga qarshi 3 ta o‘yin o‘tkazdi.

O‘zbekiston - Togo - 5:3
O‘zbekiston - Kot d’Ivuar - 0:0
O‘zbekiston - Marokash - 0:3

Umuman olganda, Osiyo qit’asi termalari ishtirokidagi musobaqa turgan bir vaqtda Afrika terma jamoalarining afzal bilingani yaxshi bo‘ldi. Biz Osiyoda kim qanday ekanligini yoddan bilamiz, Afrika va umuman notanish raqiblar esa g‘oyatda zarur. Olimpiyachilar o‘zlariga ma’lum bo‘lmagan va o‘yingacha kuchiga qanday baho berish mumkinligini bilmaganlari raqiblarga qarshi o‘ynab ko‘rishlari muhim.

Afsuski, so‘nggi ikki bellashuv tungi 2 dan keyin start oldi. Bizning futbolchilar odatda bu vaqtda uxlayotgan bo‘ladi. Bu nafaqat Marokashdagi o‘yinlarda muammo tug‘diradi, balki olimpiyachilar Toshkentga qaytganidan keyin yana bir muammo qarshisidan chiqadi. Shunchaki Ramazon oyi davom etayotganidan kelib chiqib, tashkilotchilar shunga jazm etishdi.

Marokashning bizdan bir bosh ustun ekanligini oldindan bilardik. Kim uchundir 0:3 kutilmagan bo‘lsa, demak bu odam Marokash futbolining bugungi holati haqida yaxshi tasavvurga ega emas. Marokash va Ispaniyani bir necha o‘n kilometrgina ajratib turadi, shuning o‘ziyoq ular kimga qarab intilayotganidan darak berishi mumkin. Togo va Kot-d’Ivuar bilan o‘yinlarga esa ko‘p xulosalarga sabab bo‘ldi.

Togo bilan 2 ta muammo aniq ko‘rindi. Birinchisida noma’lum raqibga qarshi o‘yinni boshlab olishda muammo yuzaga keldi. Keyin esa termamiz 5 ta gol urganidan keyin muammo boshlandi. Kapadze yon daftariga buni bitib qo‘ygani aniq.

Ivuar biz bilan o‘yinning bir taymini bir kishi kam bo‘lib o‘tkazdi va darvoza dahlsizligini saqlab qoldi. Superliga va U21 chempionatining dastlabki uch turida esa Kapadze futbolchilari ko‘p bor maydondan chetlatildi. Demak, murabbiy yengib o‘tishi va tayyorlanishi kerak bo‘lgan yana bir mavzu bor.

Shularni inobatga olsak, Marokashdagi yig‘in foydali bo‘ldi.

Diyor Imomxo‘jayev.