Pro-liganing 3-turidan o‘rin olgan “Navbahor-farm” – “Dinamo” (0:3) uchrashuvidan so‘ng, OAV xodimlari mezbonlar murabbiyi Karimjon Bozorovdan o‘yin haqidagi fikrlarini so‘rashdi va  savollar bilan murojaat qilishdi.           .

O‘yin haqida
— So‘zim avvalida bugungi mag‘lubiyat uchun muxlislardan uzr so‘rayman. O‘zingizga ma’lum, azaldan Namangandagi o‘yinlarda futbolchilarda bosim yuzaga keladi. Yigitlar ushbu bosimni yenga olishmadi. Vaholanki, uchrashuvning birinchi bo‘limida bizda 2-3 ta golga tortadigan yaqqol vaziyatlar vujudga kelgandi. Biroq omad bizdan yuz o‘girdi. Futbol 90 daqiqadan iboratligini bilardik. Ammo... Mehmonlar esa tezkor gol urishga muvaffaq bo‘lishdi. Bu rejalarimizga o‘zgartirish kiritib yubordi. Yigitlar qo‘ldan kelganicha harakat qilishdi.

Ikkinchi bo‘limda o‘yinni kuchaytirish maqsadida, zaxiradan maydonga tushirilgan futbolchilar o‘yinga kirishib keta olishmadi. Qo‘pol xatodan so‘ng, o‘z darvozamizdan ikkinchi to‘pni o‘tkazib yubordik va mazkur gol yigitlarga ruhan ta’sir qildi.

Endi bu xatolar ustida ishlab, ulardan xulosa chiqarib, keyingi bahslarda muxlislarni xursand qilishga intilamiz.

— Tan olish kerak, “Dinamo” tarkib va tajriba borasida kuchli.  Bu borada nima deya olasiz?  
— Farm jamoamizning maqsadi, yosh futbolchilarni tarbiyalab, tajribalarini oshirish. Pro liganing ham kuchli ekanligini “Dinamo”ning tarkibiga nazar tashlab bilsa bo‘ladi. Samarqandliklar tarkibidan tajribali futbolchilar o‘rin olishgan. Shunday bo‘lsada, yigitlar kuchli raqibga munosib qarshilik ko‘rsatishga intilishdi. Ammo bizdan omad yuz o‘girdi. Yana qaytaraman, futbol 90 daqiqa o‘ynaladi.  

— Jamoa bosh murabbiyi Rashid G‘ofurovning zaxira o‘rindig‘idan joy olmaganligi ham o‘yinga o‘z ta’sirini o‘tkazdimi?
— Albatta, o‘tkazdi. Baribir bosh murabbiyning o‘rni boshqa. Rashid G‘ofurovning diskvalifikasiyasi muddati yakunlandi va keyingi uchrashuvda u zaxira o‘rindig‘idan joy oladi.

— Futbolchilarni alishtirishda Rashid G‘ofurov bilan maslahatlashdingizmi?
— Albatta, maslahatlashdim. Zaxiradan maydonga tushirilganlar ham mahoratli futbolchilar hisoblanishadi. Biroq, ta’kidlaganimdek, ular o‘yinga kirishib keta olishmadi hamda o‘z imkoniyatlaridan yetarlicha foydalana olishmadi.

Bu futbolning bir bo‘lagi hisoblanadi va endi keyingi bahslarda bunday xatolarni takrorlamaslikka harakat qilamiz.

— “Navbahor-farm” Pro-liga debyutanti hisoblanadi va ushbu liga o‘yinlariga birdaniga kirishib ketish oson emas. Ilk turlardagi natijalardan fojia yasamaslik kerak. Shunday bo‘lsada, futbolchilarni ruhiy tushkunlikdan qanday olib chiqmoqchisizlar?
— O‘yinlarni tahlil qilib, yigitlarni keyingi bahslarga ruhlantirishga intilamiz. Hozircha bizga gol yetishmayapti. Xudo xohlasa, keyingi o‘yinlarda gollar hisobi ochilsa, hammasi yaxshi bo‘ladi hamda muxlislarni o‘z g‘alabalarimiz bilan xursand etishga harakat qilamiz.    

“Navbahor” PFK matbuot xizmati.