Superliga 4-turi doirasida o‘z maydonida OKMK klubiga qarshi durang qayd etgan «Neftchi» klubi ustozi Vitaliy Levchenko durang adolatli natija bo‘lgani, jamoasi qaysi vaziyatlarda xatoga yo‘l qo‘ygani va Akbar To‘rayev haqida fikr bildirdi.

«Avvalo, bugun ikki yetakchi jamoaning o‘yini ko‘pchilikda qiziqish uyg‘otgani tabiiy. Biz ham, raqib ham chempionat yetakchilari bo‘lib turibmiz. Raqib tajribali va standart vaziyatlardan foydalanishda juda usta ekanini bilardik. Birinchi o‘tkazib yuborilgan golda ham ular standart vaziyatdan foydalanishdi. Bu vaziyatda biroz diqqat yo‘qotdik va ularga gol urishga sharoit yaratib berdik. Ikkinchisida ham xatoga yo‘l qo‘ydik. Vaziyatni o‘nglash qiyin kechdi, ammo, shogirdlarim xarakter ko‘rsatishdi va bundan xursandman. Umuman, o‘yindagi vaziyatlarni va o‘yin qanday kechganini inobatga olsak, durang adolatli bo‘ldi deyish mumkin», - deydi Levchenko.

Akbar To‘rayev jamoamiz futbolchilaridan birining butsalari ipini echilib ketganini uchun o‘yinda biroz pauza ushladi va futbolchi butsalarining ipini bog‘lashini kutib turdi. Bu sizga uning vaqt cho‘zganidek tasavvur uyg‘otgan bo‘lishi mumkin. Ammo, biz uyda o‘ynadik va tabiiyki, uyda barcha g‘alaba qozonishni istaydi. Shunday ekan, uni vaqt cho‘zdi deyish biroz noto‘g‘ri.

Bugun biz ikki marotada hisobda ortda borib, yakunda tenglashtirganimiz uchun biz bir ochko ishladik deyishim mumkin va bu mantiqan to‘g‘ri. O‘yin kutganimizdek qiyin kechdi va biz bu bir ochkoni qo‘lga kiritganimizdan xursandmiz”, — dedi Levchenko.