"Liverpul" ustozi Yurgen Klopp va "Manchester Siti" menejeri Pep Gvardiola APLdagi eng yaxshi murabbiylar sanaladi. Ular dunyodagi eng yaxshi ikkita jamoani bunyod etdi. Ushbu klublar doimiy ravishda Angliyadagi sovrinlar uchun da’vogarlik qilib keladi. Shuningdek, "shaharliklar" va mersisaydliklar yo‘lboshchilari YECHL bosh sovrinini yutish borasida tajribaga ega.
Katta maqsadlar qo‘yish va ularga erishish, tarkibni kuchli qilishni talab etadi. Aynan kuchli futbolchilar bilan har ikki jamoa katta yutuqlarga erishib kelgan. Mana masalan, Gvardiola Manchesterga kelganidan beri katta pul sarflashdan qo‘rqmadi. Buni uning o‘zi ham ta’kidlaydi: "Bizda katta yulduzlarni sotib olish uchun katta pul mavjud. Albatta, yaxshi jamoa uchun faqatgina buning o‘zi yetarli bo‘lmaydi. Avvalo, sizda kuchli rahbariyat, yaxshi darajaga ega hodimlar, yordamchi murabbiylar va albatta maydonda har narsaga qodir futbolchilar bo‘lishi kerak. Siz o‘rtamiyona futbolchilar bilan faqat bir marta g‘alaba qozonishingiz mumkin. Ammo ko‘plab o‘yinlarni yutib, titullarga ega chiqish uchun sizga top-futbolchilar zarur. Top-futbolchilar esa arzon turmaydi".
Yurgen Klopp ham doimo pul masalasi juda muhim ekanini aytadi. Ammo sotib olish uchun sotish ham kerakligini unutmaslik kerakligini ta’kidlaydi: "Men ishlayotgan jamoa boy. Ammo bu yerda rejalar bor. Biz sotuvdan to‘plagan pulimizga xaridlarni amalga oshiramiz. Biz uchun pul osmondan tushmaydi: ko‘proq jamg‘arsak, ko‘proq sarflaymiz, kamroq jamg‘arsak - kamroq. Biz sotib olayotgan futbolchilar, maydonda oxir-oqibat kerakli bo‘lib chiqishi lozim. Aks holda, rejalarimiz amalga oshmaydi".
Quyida har ikki murabbiy tomonidan Angliyadagi faoliyati davomida sarflangan va jamg‘arilgan pullar miqdori havola etiladi. Demak, boshladik!
Yurgen Klopp "Liverpul"da:
Besh yirik xarid
1. Virjil van Deyk – 76.2 million funt
2. Darvin Nunyes – 67.5 million funt
3. Alisson– 56.3 million funt
4. Nabi Keyta – 54 million funt
5. Fabinyo – 40.5 million funt
Besh yirik sotuv
1. Filippe Koutinyo – 121.5 million funt
2. Sadio Mane – 28.8 million funt
3. Kristian Benteke – 28.1 million funt
4. Mamadu Sako – 25.4 milliob funt
5. Denni Ingz – 22.6 million funt
Umumiy xarajat: 556.78 million
Umumiy sotuv: 433.45 million
Sof sarf: 123.33 million funt
Pep Gvardiola "Manchester Siti"da:
Besh yirik xarid
1. Jek Grilish – 105.8 million funt
2. Ruben Diash – 61.2 million funt
3. Riyad Maxrez – 61 million funt
4. Joau Kanselu – 58.5 million funt
5. Aymerik Lyaport – 58.5 million funt
Besh yirik sotuv
1. Leroy Sane – 54 million funt
2. Raxim Sterling – 50.9 million funt
3. Ferran Torres – 49.5 million funt
4. Gabriel Jezus – 47 million funt
5. Danilo – 33.3 million funt
Umumiy xarajat: 1.06 milliard funt
Umumiy sotuv: 514 million funt
Sof sarf: 545.9 million funt
ISMATOV J.
