Superliganing 4-turidan o‘rin olgan “Bunyodkor” – “Turon” (0:0) uchrashuvidan so‘ng mehmonlar bosh murabbiyi Baxtiyor Ashurmatov o‘z fikrlarini bildirib o‘tdi.

"Bugun maydonda teng kuchli ikki jamoa harakat qildi. Birinchi bo‘limda biz ko‘proq hujum qilgan bo‘lsak, ikkinchisida mezbonlar faol harakat qilishdi. So‘nggi daqiqadagi vaziyatni inobatga olmasak, darvozamiz oldida aytarli vaziyatlar yuzaga kelmadi. Bugun ilk bor darvozamiz daxlsizligini saqlab qoldik. O‘tgan uchta bahsdan so‘ng futbolchilarda biroz tushkunlik bor edi. O‘ylaymanki, ularda o‘zlariga bo‘lgan ishonch qaytdi. Umuman olganda, o‘yin durangga mos bo‘ldi. “Bunyodkor” omad va mehnat evaziga 10 ochko yig‘di, bizga esa omad kelmadi. Biz boy berilgan ochkolar o‘rnini to‘ldirishimiz kerak. Murabbiy sifatida shuni aytamanki, jamoamiz Superligada qolish uchun kurashadigan jamoa emas. Biz bu vaziyatdan chiqib ketamiz.

Kumburovich, Beglarashvili va Boyovich singari legionerlarni tarkibga kech jalb qildik. O‘tgan uchrashuvda ikkita hujumchi bilan harakatlandik va Boyovich yomon harakat qilmadi. Bugun safarda “Bunyodkor” bilan kuch sinashganimiz sabab, bitta hujumchi – Norbekovning xizmatlaridan foydalanishga qaror qildik. Legionerlarimizdan ko‘nglim to‘q. Bugun Beglarashvilining o‘yinidan ham qoniqish hosil qildim. To‘p nazorati raqibga o‘tganida, aynan Zakariya uni o‘zimizda saqlashni uddaladi.

Tarkibida Abdumannopov, Ivanovich va Abdurahmonov singari tezkor futbolchilari bor “Bunyodkor”ga qarshi ochiq o‘yin ko‘rsatganimizda darvozamiz oldida xavfli vaziyatlar yaratilishi mumkin edi. Shu sabab, raqibning sabrli o‘yiniga shunday javob qaytardik.

So‘nggi daqiqada gol o‘tkazib yuborganimizda, men ortga qaytmasdan, shu yerda qolardim. Tasavvur ham qilolmayman. Tan olish kerak, bugungi bahs durangga mos edi. Mag‘lubiyat har ikki jamoa uchun ham alamli bo‘lardi. “Buxoro”, “Nasaf” va “Surxon”ga qarshi bellashuvlarning barchasida so‘nggi daqiqalarda to‘p o‘tkazib yubordik. Futbolda bir soniya ham diqqatni yo‘qotmaslik kerak”, – dedi Ashurmatov.