Superliga 4-turi doirasidagi "Olimpik" – "Andijon" (0:1) uchrashuvidan keyin mezbonlar bosh murabbiyi Timur Kapadze o‘yin haqida o‘z fikrlarini bildirib o‘tdi.
"Avvalo "Andijon" jamoasini g‘alaba bilan tabriklayman. O‘yinga keladigan bo‘lsak, uchrashuv boshidayoq standartdan gol o‘tkazib yuborganimiz o‘z ta’sirini o‘tkazdi. Chunki "Andijon" keyinchalik himoyaga urg‘u berdi va bu mudofaani yorib o‘tishga qayerdadir mahorat yetmagan bo‘lsa, qayerdadir tajriba yetishmadi. Har ikkala jamoa uchun ham foydali o‘yin bo‘ldi. Mavjud vaziyatlardan foydalanishimiz mumkin edi.
Biz uchun eng muhimi o‘z o‘yinimiz. Ahamiyat beradigan bo‘lsak, ko‘p jamoalar oson uchrashuv o‘tkazyapti. Ko‘proq kuch orqali, uzatmalar orqali o‘ynayapti. Lekin men ko‘proq kombinasion harakat qilishga urg‘u beryapman. Natija o‘z yo‘liga, o‘ynasak keladi. "Olimpik" hech bir jamoadan kuchsiz emas. Hali zich himoyaga ega jamoalarga qarshi o‘ynaymiz. Zaxira va 5 nafar futbolchining diskvalifikasiyaga uchragani ayniqsa ikkinchi taymda bilinib qolyapti. Keyingi o‘yinlarda hammasi qaytadi va "Turon" bilan ham, "Buxoro" bilan hammasi maydonda hal bo‘ladi", deydi murabbiy.
