Суперлига 4-тури доирасидаги "Олимпик" – "Андижон" (0:1) учрашувидан кейин мезбонлар бош мураббийи Тимур Кападзе ўйин ҳақида ўз фикрларини билдириб ўтди.

"Аввало "Андижон" жамоасини ғалаба билан табриклайман. Ўйинга келадиган бўлсак, учрашув бошидаёқ стандартдан гол ўтказиб юборганимиз ўз таъсирини ўтказди. Чунки "Андижон" кейинчалик ҳимояга урғу берди ва бу мудофаани ёриб ўтишга қаердадир маҳорат етмаган бўлса, қаердадир тажриба етишмади. Ҳар иккала жамоа учун ҳам фойдали ўйин бўлди. Мавжуд вазиятлардан фойдаланишимиз мумкин эди.

Биз учун энг муҳими ўз ўйинимиз. Аҳамият берадиган бўлсак, кўп жамоалар осон учрашув ўтказяпти. Кўпроқ куч орқали, узатмалар орқали ўйнаяпти. Лекин мен кўпроқ комбинацион ҳаракат қилишга урғу беряпман. Натижа ўз йўлига, ўйнасак келади. "Олимпик" ҳеч бир жамоадан кучсиз эмас. Ҳали зич ҳимояга эга жамоаларга қарши ўйнаймиз. Захира ва 5 нафар футболчининг дисквалификасияга учрагани айниқса иккинчи таймда билиниб қоляпти. Кейинги ўйинларда ҳаммаси қайтади ва "Турон" билан ҳам, "Бухоро" билан ҳаммаси майдонда ҳал бўлади", дейди мураббий.