"Chelsi" yigirma yildan oshiq shonli tarixida ko‘plab murabbiy almashtirgan. Bu jarayonda ayrim bo‘shliqlar paydo bo‘ladi. Ana shu joylarni to‘ldirish maqsadida vaqtinchalik murabbiylar tayinlanadi. "Chelsi" ham bunday amaliyotlarga qo‘l urgan. Xususan, jamoa o‘z tarixi davomida besh marta bosh murabbiy vazifasini bajaruvchi mutaxassisni tayinlaydi. Bruno Saltor oltinchisi bo‘ldi. U Grem Potter o‘rnida qoladigan bo‘ldi.
Devid Uebb – 1993
"Chelsi"ning ilk yurishi bu borada 1993 yilda yuz beradi. 1992-93 yilgi mavsum o‘rtasida jamoa murabbiy almashtiradi – Porterfild ishdan olinadi. Uning o‘rnini "Chelsi"da 1960 va 70 yillar boshida harakat qilgan Devid Uebb egallaydi. Albatta, bu vaqtinchalik ish edi.
Gus Xiddink – 2009
Xiddink Luiz Felipe Skolarining ishdan haydalishi ortidan jamoaga olib kelinadi. Daniyalik mutaxassis "Chelsi"ning tabiati va Abramovich niyatlaridan yaxshi xabardor edi. Negaki, u Rossiya terma jamoasida ham ishlagandi. Xiddink 22 ta o‘yin davomida londonliklarga boshchilik qilib, faqat 1 ta o‘yinda mag‘lubiyatga uchraydi. Ushbu murabbiy "Chelsi"ni APLda 3 o‘ringa olib chiqadi. Angliya kubogida g‘olib bo‘ladi. YECHLda esa finalga qadar yetib boradi.
Roberto Di Matteo – 2012
Aytinchi, tarixda Di Matteodan ham ko‘ra omadliroq vaqtinchalik murabbiy bo‘lganmi? Biznincha, yo‘q! Negaki, italyan mutaxassisi "Chelsi"da vaqtinchalik ishlab, jamoani Angliya kubogi va YECHLda chempionga aylantiradi. Di Matteo bu yo‘lda "Barselona" va "Bavariya"ni mag‘luniyatga uchratgan edi.
Rafael Benites – 2012-13
"Chelsi" muxlislari Di Matteo Rafael Benitesga almashtirilganida, juda ham xafa bo‘lishadi. Negaki, ularda oldin "Liverpul"ni boshqargan ispanga nisbatan hurmat yo‘q edi. Shu sababdan uy bahslarida Benites sha’niga yomon so‘zlar aytilib, hushtaklar chalinadi. Rafael Benites mavsum oxirida Yevropa ligasida zafar quchadi. Ammo bu yetarli emasdi. Shu sabab Joze Mourinyoga almashtiriladi.
Gus Xiddink – 2015-16
Xiddink Joze Mourinyodan mavsum yarmida qolgan jamoani muvozanatda ushlab turishi kerak edi. Biroq, uning ikkinchi bor kelishi 2009 yildagi kabi omadli bo‘lmaydi. Negaki, "Chelsi"da kuchli tartibsizlik hukmronlik qilayotgandi. Jamoa Chempionshipga tushib ketish xavfi ostida qoladi. Sobiq "Real" murabbiyi avvalgidek muvaffaqiyatga erishmagan bo‘lsa ham, jamoani APLda osonlik bilan olib qoldi. Klub 10 o‘rinda mavsumni tugatib, yangi mavsumga Antonio Konteni tayinlaydi.
ISMATOV J.
