"Челси" йигирма йилдан ошиқ шонли тарихида кўплаб мураббий алмаштирган. Бу жараёнда айрим бўшлиқлар пайдо бўлади. Ана шу жойларни тўлдириш мақсадида вақтинчалик мураббийлар тайинланади. "Челси" ҳам бундай амалиётларга қўл урган. Хусусан, жамоа ўз тарихи давомида беш марта бош мураббий вазифасини бажарувчи мутахассисни тайинлайди. Бруно Сальтор олтинчиси бўлди. У Грэм Поттер ўрнида қоладиган бўлди.
Дэвид Уэбб – 1993
"Челси"нинг илк юриши бу борада 1993 йилда юз беради. 1992-93 йилги мавсум ўртасида жамоа мураббий алмаштиради – Портерфилд ишдан олинади. Унинг ўрнини "Челси"да 1960 ва 70 йиллар бошида ҳаракат қилган Дэвид Уэбб эгаллайди. Албатта, бу вақтинчалик иш эди.
Гус Хиддинк – 2009
Хиддинк Луиз Фелипе Сколарининг ишдан ҳайдалиши ортидан жамоага олиб келинади. Даниялик мутахассис "Челси"нинг табиати ва Абрамович ниятларидан яхши хабардор эди. Негаки, у Россия терма жамоасида ҳам ишлаганди. Хиддинк 22 та ўйин давомида лондонликларга бошчилик қилиб, фақат 1 та ўйинда мағлубиятга учрайди. Ушбу мураббий "Челси"ни АПЛда 3 ўринга олиб чиқади. Англия кубогида ғолиб бўлади. ЕЧЛда эса финалга қадар етиб боради.
Роберто Ди Маттео – 2012
Айтинчи, тарихда Ди Маттеодан ҳам кўра омадлироқ вақтинчалик мураббий бўлганми? Бизнинча, йўқ! Негаки, италян мутахассиси "Челси"да вақтинчалик ишлаб, жамоани Англия кубоги ва ЕЧЛда чемпионга айлантиради. Ди Маттео бу йўлда "Барселона" ва "Бавария"ни мағлуниятга учратган эди.
Рафаэль Бенитес – 2012-13
"Челси" мухлислари Ди Маттео Рафаэль Бенитесга алмаштирилганида, жуда ҳам хафа бўлишади. Негаки, уларда олдин "Ливерпул"ни бошқарган испанга нисбатан ҳурмат йўқ эди. Шу сабабдан уй баҳсларида Бенитес шаънига ёмон сўзлар айтилиб, ҳуштаклар чалинади. Рафаэль Бенитес мавсум охирида Европа лигасида зафар қучади. Аммо бу етарли эмасди. Шу сабаб Жозе Моуриньога алмаштирилади.
Гус Хиддинк – 2015-16
Хиддинк Жозе Моуриньодан мавсум ярмида қолган жамоани мувозанатда ушлаб туриши керак эди. Бироқ, унинг иккинчи бор келиши 2009 йилдаги каби омадли бўлмайди. Негаки, "Челси"да кучли тартибсизлик ҳукмронлик қилаётганди. Жамоа Чемпионшипга тушиб кетиш хавфи остида қолади. Собиқ "Реал" мураббийи аввалгидек муваффақиятга эришмаган бўлса ҳам, жамоани АПЛда осонлик билан олиб қолди. Клуб 10 ўринда мавсумни тугатиб, янги мавсумга Антонио Контени тайинлайди.
ИСМАТОВ Ж.
