Mourinyo faqat tovon pulidan 60 million yevro ishlab oldi!
Murabbiyga ishdan bo‘shatilgandan so‘ng tovon puli to‘lash har qanday klub rahbari uchun yoqimsiz jarayon bo‘lib tuyuladi, bir kishidan tashqari. Roman Abramovich o‘zining sobiq qo‘l ostidagilar iste’foga chiqqanidan keyin juda saxiylik bilan ularga «minnatdorchilik» bildirgan. «Chelsi» murabbiylari bu borada «ilg‘or». Yana qaysi klublarda mutaxassislarga ishdan bo‘shatilganlik uchun katta pul to‘langanini aytish mumkin?
Maurisio Pochettino, «Tottenxem», 14,1 mln yevro
Argentinalik qo‘l ostida «Tottenxem»ning natijalari sezilarli darajada yaxshilangan. Pochettino London klubi bilan hech narsa yutmaganiga qaramay, jamoa u bilan Chempionlar ligasi finaliga chiqdi, Angliya chempionatida ikkinchi va ikki marta uchinchi o‘rinlarni egalladi. Natijalar yomonlashganda, murabbiy ishdan bo‘shatildi. O‘shanda «Tottenxem» 12 turdan keyin 14-o‘rinda edi. Maurisio London klubida deyarli 5,5 yil ishladi.
Joze Mourinyo, «Tottenxem», 22,7 million yevro
Joze «Tottenxem»da bir yarim yil ishladi. Portugaliyalik bilan, boshqa murabbiylar singari, «shporlar» ham hech narsa yutmadi - ular Chempionlar ligasining 1/8 finalida «Leypsig»dan, keyingi mavsumda esa Yevropa Ligasining 1/8 finalida Zagrebning «Dinamo»sidan mag‘lubiyatga uchradi. Mourinyo boshchiligida «Tottenxem» 86 o‘yindan 45 tasida g‘alaba qozongan. Balki, agar portugaliyalik iste’foga chiqarilmaganida, u klubga Liga kubogini olib kelishi mumkin edi – axir, jamoani finalga olib chiqqan Joze edi.
Loran Blan, «PSJ», 19,3 mln yevro
Fransiyalik murabbiy «PSJ» bilan 11 ta milliy sovrinni qo‘lga kiritgan. Blan debyutidayoq Fransiya Superkubogini qo‘lga kiritdi va birinchi mavsumidayoq klubga Liga kubogi va chempionatning bosh sovrinini olib keldi. Fransiyalik murabbiy «PSJ» bilan shartnomasini ikki marta uzaytirdi: ikkinchi martasida 2016 yildan 2020 yilgacha edi, lekin Yevro-2016 vaqtida jamoani tark etgan. Rahbariyat Chempionlar ligasidagi muvaffaqiyatsizlikdan keyin shunday qarorga kelgan.
Joze Mourinyo, «Chelsi», 20,4 million yevro
Portugaliyalik uch yil ichida oltita sovrinni, jumladan, Angliyada ikkita chempionlikni qo‘lga kiritdi. Mourinyo klub xo‘jayini Roman Abramovich bilan bir qator kelishmovchiliklarga qaramay, tomonlarning o‘zaro kelishuvi asosida «Chelsi»ni tark etdi. Portugaliyalik «ko‘klar» tarixidagi eng muvaffaqiyatli murabbiy sifatida jamoadan ketdi. 2013 yilda Joze «Stemford Bridj»ga qaytdi va yana bir chempionlik va Liga kubogini qo‘lga kiritdi.
Joze Mourinyo, «Manchester Yunayted», 22,2 million yevro
«Manchester Yunayted»ning Mourinyo qo‘l ostidagi yurishi Aleks Fergyusondan keyingi eng muvaffaqiyatlisi edi. O‘yin uslubi bilan ko‘pchilikning tanqidiga uchragan portugaliyalik murabbiy klubga Yevropa Ligasi, Angliya Superkubogi va Liga kubogida g‘alaba keltirdi. Uchta sovrin ham bir mavsumda qo‘lga kiritildi. Joze ikki yarim yil ishladi va «Manchester Yunayted» 2018/2019 yilgi mavsumda liga peshqadamidan 19 ochkoga ortda qolganida ishdan bo‘shatildi.
1. Antonio Konte, «Chelsi», 29,7 million yevro
2018 yilda Kontening «Chelsi»dan iste’foga chiqarilishi futbol tarixidagi rekord summaga sabab bo‘ldi. Bu summaga London klubi hisobotida qayd etilganidek, nafaqat bosh murabbiy, balki uning xodimlariga to‘lovlar, shuningdek, sud xarajatlari ham kiradi. Ikki yil ichida Antonio «Chelsi» bilan chempionlik va Angliya kubogini qo‘lga kiritdi. Italiyalik murabbiyning ikkinchi mavsumi omadsiz chiqdi: turnir jadvalida beshinchi o‘rin va Chempionlar ligasini qo‘ldan boy berish. Bundan tashqari, Konte «Chelsi» yulduzlari Eden Azar va Diyego Kosta bilan kelisha olmadi.
