Моуриньо фақат товон пулидан 60 миллион евро ишлаб олди!
Мураббийга ишдан бўшатилгандан сўнг товон пули тўлаш ҳар қандай клуб раҳбари учун ёқимсиз жараён бўлиб туюлади, бир кишидан ташқари. Роман Абрамович ўзининг собиқ қўл остидагилар истеъфога чиққанидан кейин жуда сахийлик билан уларга «миннатдорчилик» билдирган. «Челси» мураббийлари бу борада «илғор». Яна қайси клубларда мутахассисларга ишдан бўшатилганлик учун катта пул тўланганини айтиш мумкин?
Маурисио Почеттино, «Тоттенхэм», 14,1 млн евро
Аргентиналик қўл остида «Тоттенхэм»нинг натижалари сезиларли даражада яхшиланган. Почеттино Лондон клуби билан ҳеч нарса ютмаганига қарамай, жамоа у билан Чемпионлар лигаси финалига чиқди, Англия чемпионатида иккинчи ва икки марта учинчи ўринларни эгаллади. Натижалар ёмонлашганда, мураббий ишдан бўшатилди. Ўшанда «Тоттенхэм» 12 турдан кейин 14-ўринда эди. Маурисио Лондон клубида деярли 5,5 йил ишлади.
Жозе Моуриньо, «Тоттенхэм», 22,7 миллион евро
Жозе «Тоттенхэм»да бир ярим йил ишлади. Португалиялик билан, бошқа мураббийлар сингари, «шпорлар» ҳам ҳеч нарса ютмади - улар Чемпионлар лигасининг 1/8 финалида «Лейпциг»дан, кейинги мавсумда эса Европа Лигасининг 1/8 финалида Загребнинг «Динамо»сидан мағлубиятга учради. Моуриньо бошчилигида «Тоттенхэм» 86 ўйиндан 45 тасида ғалаба қозонган. Балки, агар португалиялик истеъфога чиқарилмаганида, у клубга Лига кубогини олиб келиши мумкин эди – ахир, жамоани финалга олиб чиққан Жозе эди.
Лоран Блан, «ПСЖ», 19,3 млн евро
Франциялик мураббий «ПСЖ» билан 11 та миллий совринни қўлга киритган. Блан дебютидаёқ Франция Суперкубогини қўлга киритди ва биринчи мавсумидаёқ клубга Лига кубоги ва чемпионатнинг бош совринини олиб келди. Франциялик мураббий «ПСЖ» билан шартномасини икки марта узайтирди: иккинчи мартасида 2016 йилдан 2020 йилгача эди, лекин Евро-2016 вақтида жамоани тарк этган. Раҳбарият Чемпионлар лигасидаги муваффақиятсизликдан кейин шундай қарорга келган.
Жозе Моуриньо, «Челси», 20,4 миллион евро
Португалиялик уч йил ичида олтита совринни, жумладан, Англияда иккита чемпионликни қўлга киритди. Моуриньо клуб хўжайини Роман Абрамович билан бир қатор келишмовчиликларга қарамай, томонларнинг ўзаро келишуви асосида «Челси»ни тарк этди. Португалиялик «кўклар» тарихидаги энг муваффақиятли мураббий сифатида жамоадан кетди. 2013 йилда Жозе «Стэмфорд Бридж»га қайтди ва яна бир чемпионлик ва Лига кубогини қўлга киритди.
Жозе Моуриньо, «Манчестер Юнайтед», 22,2 миллион евро
«Манчестер Юнайтед»нинг Моуриньо қўл остидаги юриши Алекс Фергюсондан кейинги энг муваффақиятлиси эди. Ўйин услуби билан кўпчиликнинг танқидига учраган португалиялик мураббий клубга Европа Лигаси, Англия Суперкубоги ва Лига кубогида ғалаба келтирди. Учта соврин ҳам бир мавсумда қўлга киритилди. Жозе икки ярим йил ишлади ва «Манчестер Юнайтед» 2018/2019 йилги мавсумда лига пешқадамидан 19 очкога ортда қолганида ишдан бўшатилди.
Антонио Конте, «Челси», 29,7 миллион евро
2018 йилда Контенинг «Челси»дан истеъфога чиқарилиши футбол тарихидаги рекорд суммага сабаб бўлди. Бу суммага Лондон клуби ҳисоботида қайд этилганидек, нафақат бош мураббий, балки унинг ходимларига тўловлар, шунингдек, суд харажатлари ҳам киради. Икки йил ичида Антонио «Челси» билан чемпионлик ва Англия кубогини қўлга киритди. Италиялик мураббийнинг иккинчи мавсуми омадсиз чиқди: турнир жадвалида бешинчи ўрин ва Чемпионлар лигасини қўлдан бой бериш. Бундан ташқари, Конте «Челси» юлдузлари Эден Азар ва Диего Коста билан келиша олмади.
