"Inter"ning sobiq futbolchisi Marko Materassi 2010 yildagi "trebl"dan so‘ng Joze Mourinyo jamoani qanday tark etganini esladi.

"Men unga: "Bor, yo‘qol"- dedim. Chunki u meni Benites bilan qoldirdi" - dedi Materassi IFTV telekanaliga bergan intervyusida.

Ma’lumki, Materassi Mourinyo bilan ajoyib munosabatda edi. Portugaliyalik murabbiy ajoyib mavsumdan so‘ng "Inter"ni tark etganida futbolchi hatto yig‘lab yubordi. O‘shanda Mourinyo "Real"ni boshqargan bo‘lsa, Rafael Benites "Inter"ni qabul qilib oldi.

"Mourinyo o‘zgacha edi. U bizning xotinlarimiz va barcha bolalarimizning ismlarini bilar edi. Men bunday murabbiyni hech qachon uchratmaganman. Bir kuni u xotinim bilan uchrashib: "Chao, Daniela" - dedi. Bu men uchun kutilmagan bo‘ldi", - deya qo‘shimcha qildi Materassi.