O‘zbekiston Superligasi 5-turi doirasida o‘z maydonida “Olimpik” klubiga minimal hisobda imkoniyatni boy bergan “Turon” klubi bosh murabbiyi Baxtiyor Ashurmatov raqibning kuchi, vaziyatni o‘nglashga jamoasining kuchi etishi, omad va muxlislar haqida gapirdi.

“Ochig‘ini aytishim kerak, “Olimpik” bizdan ko‘ra shakllanganroq jamoa ekani ko‘rinib turibdi. Bizga shunchaki omad yetishmayapti. Darvoza to‘siniga to‘p tegishi, imkoniyatlar yaratib ulardan foydalana olmaslik – omad kelmayotgani bilan izohlash mumkin. Juda qiyin vaziyatga tushib qoldik. Ammo, bu vaziyatdan chiqib ketish uchun jamoamning kuchi va qurbi etadi. Jamoadagi futbolchilarning darajasiga ishonaman.

Aytganimdek, raqib bizdan ko‘ra shakllangan jamoa. Shuni hisobga olib o‘yinni bir hujumchi bilan boshladik. Ammo, uyimizda faqat durang uchun o‘ynash noto‘g‘ri ekanligini anglab ikkinchi taymni boshqacha boshladik. Shunday bo‘lsada, imkoniyatlardan foydalana olmadik va gol o‘tkazib yubordik. Qaytarib aytaman, bu tarkib bilan bundanda yaxshiroq o‘ynashimiz va vaziyatni o‘nglashimiz kerak. Bunga ishonaman. Tarkib yomon emas va bundan ham yaxshiroq o‘ynay olamiz.

Turnir jadvalidagi hozirgi o‘rnimiz bizga yarashmaydigan o‘rin. Buni to‘liq anglab turibmiz va vaziyatni o‘nglash uchun qo‘limizdan kelganicha astoydil ishlaymiz. Aniq aytishim mumkinki, murabbiylar shtabi chin yurakdan ishlayapti. Biz ham muxlislarni xursand qilishni, g‘alaba qozonib vaziyatni o‘nglashni istaymiz. Rahbariyat bizga barcha sharoitlarni yaratib berayapti. Ammo, natija yaxshi emas. Ularni ham tushunib turibman. Har qanday qarorga to‘g‘ri yondashamiz. Jamoa qiyin holatdan chiqib ketishiga ishonaman.

Shu o‘rinda jamoamiz muxlislaridan minnatdorman. Muxlislari bundan ko‘p bo‘lgan jamoalarda ishlaganman. Stadioniga bundan ko‘p odam kiradigan klublarda ham bunday muxlislar deyarli yo‘q. Ular o‘yindan keyin xatto kiyim almashtirish xonasigacha kirib futbolchilarni qo‘llab-quvvatlashayapti va dalda berishayapti. Ularga rahmat”,- deydi murabbiy.