Superliga 5-turi doirasida «Andijon»ni mag‘lub etgan «Neftchi» bosh murabbiyi Vitaliy Levchenko g‘alaba siri, To‘xtasinovning chetlatilishi, Kubok o‘yinlariga rejalar va jamoa g‘alabani kimga bag‘ishlagani haqida gapirdi.
«Golgacha va goldan keyin boshqa-boshqa o‘yin guvohi bo‘ldik. Maydonda kamchilik bo‘lib qolgach, raqibda ancha imkoniyatlar bo‘ldi, ammo darvozabonimizga rahmat aytaman. Bugun bizni ko‘p qutqardi. So‘nggi daqiqalargacha sabr qildik va haqli g‘alabaga erishdik.
«Chetlatish menimcha ehtiros bilan bog‘liq. Birinchi bo‘limda ogohlantirilganlarga ikkinchi bo‘limda ehtiyotroq bo‘lib o‘ynashlarini uqtirgan edik. Ammo, To‘xtasinov aynan ehtiroslarga berilib ketganidanmi, kerak bo‘lmagan joyda qo‘pollik ishlatdi va maydondan chetlatildi».
«Kubok bahslarida albatta rotasiya qilamiz. Busiz ilojimiz yo‘q. Tig‘iz taqvim va futbolchilarning holatidan kelib chiqib, o‘yin amaliyotiga ega bo‘lmagan futbolchilarga imkon berishga harakat qilamiz. Bizda ikkita bir xil tarkib bor. Ularning barchasiga imkon berish haqida o‘ylaymiz».
«Bugungi g‘alabamizni albatta bizni doimiy ravishda qo‘llab-quvvatlab kelayotgan muxlislarimizga bag‘ishlaymiz. Biz esa o‘z navbatida jamoaning avvalgi mavqeini tiklash va jamoaning hozirgi egallab turgan o‘rni tasodif emasligini ko‘rsatishga harakat qilamiz», - dedi Levchenko.
