Yevropa futbolidagi eng saviyali turnir Yevropa Chempionlar ligasi hisoblanadi. Ushbu musobaqada "Barselona", "Manchester Yunayted" va "Real" kabi klublar futbolchilari ko‘plab golga mualliflik qilgan. Assistlar borasida ham ayni gapni aytish mumkin. Ko‘pchilik, futboldagi eng qiyin narsa gol urish deydi. Ammo gollarni yaratish ham oson ish emas aslida. Quyida jahon darajasidagi futbolchilarning assistlar borasida YECHLda qayd etgan natijalari bilan tanishasiz.
10. Luis Suares – 26 ta uzatma
Urugvaylik hujumchi o‘zining yuqori sport-formasida hamma narsaga qodir edi. Suares nafaqat gol urish borasida, balki assistlarda ham yaxshi natijalarga ega. Futbolchining YECHLdagi faoliyati bunga isbot bo‘la oladi. 2014-15 yilgi mavsum Suares uchun chempionlik bilan tugaydi.
9. Tomas Myuller – 28 ta uzatma
Nemis hujumchisi barqarorlikning yorqin namunasi sanaladi. 15 mavsum davomida "Bavariya" safida harakat qilib kelayotgan futbolchi, YECHLda 28 ta assistga erishadi. Myullerning eng yorqin dami YECHLda "Barselona" 8-2 hisobida taslim etilgan davri edi. O‘sha o‘yinda birgina Myullerning o‘zi 3 ta assistga mualliflik qilgandi.
8. Andreas Inyesta – 29 ta uzatma
Ispaniya afsonasi o‘zi qatnashgan YECHL finallarining hammasida g‘alabaga erishgan (4 ta). Inyesta barcha davrlarning eng yaxshi yarim himoyachisi sifatida e’tirof etiladi. O‘z futbolchilik davrida Inyesta birgina uzatma bilan imkoniyatlar hosil qilish xususiyati bilan ajralib turardi.
7. Karim Benzema – 29 ta uzatma
Fransuz hujumchisi xuddi vinoga o‘xshaydi. U vaqt o‘tgani sari faqatgina yaxshilanib bormoqda. O‘z davrida u Ronaldu va Beyl soyasida edi. Ammo uning katta mehnatlari zoye’ ketmadi. "Oltin to‘p"ga erishgan hujumchi, YECHL tarixiga o‘z nomini abadiy muhrladi.
6. Xavi Ernandes – 30 ta assist
"Barselona"ning yuragi Xavi bo‘lgan davrlar, katalon klubining benefisi bilan yodga olinadi. Ayni damda o‘z sevimli jamoasini boshqarayotgan afsona, YECHL tarixida 30 ta assistga mualliflik qilgan.
5. Rayan Giggz – 30 ta uzatma
Uelslik afsonaviy futbolchi "Manchester Yunayted"ga 1990-2014 yillar davomida xizmat qiladi. Giggz yillar davomida futbol trendiga moslasha bordi. Uning harakatlari bilan "MYU" ikki bor Yevropada tengsiz deb topilgan.
4. Neymar – 33 ta uzatma
YECHL tarixida eng yorqin yulduzlardan biri, shubhasiz, Neymardir. 2015 yilgi "Barselona"ning g‘alabasida Neymar beqiyos rol o‘ynagan edi. 2020 yilda esa "PSJ" aynan braziliyalikning sa’y-harakatlari bilan finalgacha yetib boradi. Shuni ham eslatib o‘tish kerakki, Neymar bu ro‘yxatdagi eng yosh vakildir. U 31 yoshida 33 ta assistga muallif bo‘ldi.
3. Anxel Di Mariya – 38 ta uzatma
Neymar kabi Di Mariya ham YECHLda faqatgina bir marta zafar quchgan. Ammo uning bu yerda o‘ziga yarasha o‘rni bor. Argentinalik hujumchi 2014 yilgi "Real"ning g‘alabasida YECHL finalining eng yaxshi futbolchisi nomiga sazovar bo‘ladi. Anxelning chap oyog‘i uning eng muhim qurolidir.
2. Lionel Messi – 40 ta uzatma
Barcha davrlarning eng yaxshi pleymeykeri bu ro‘yxatda hozirchalik ikkinchi o‘rinda qayd etiladi. Messining YECHL yo‘li 129 ta gol va 40 ta assist bilan xarakterlanadi. Xususan, argentinalik futbolchining 2011 yilgi finalda "MYU"ga qarshi ko‘rsatgan o‘yini butun dunyoning aqlini shoshirgandi. Ayni damda ham faol bo‘lgan Messi, ushbu statistikasini yanada yaxshilashga harakat qiladi.
1. Krishtianu Ronaldu – 42 ta uzatma
Ronaldu bo‘lmay, yana kim ham bo‘lardi? Protugaliyalik hujumchi dunyoga eng yaxshi to‘purar sifatida mashhur. Ammo uning yaratuvchanlik qobiliyati ham yomon emas, aslini olganda. YECHL tarixidagi eng ko‘p gol, eng ko‘p assist va eng ko‘p sovrin yutgan futbolchi – bu Ronaldu. Shunday ekan, 37 yoshli afsona bu borada qirol!
ISMATOV J.
