Myunxenning “Bavariya” klubi hujumchisi Tomas Myuller “Manchester Siti”ga qarshi Yevropa Chempionlar Ligasi 1/4 final javob o‘yinida o‘z jamoasining kambek qilishiga ishonmayapti. Eslatib o‘tamiz, Tomas Tuxel jamoasi kecha birinchi o‘yinni safarda o‘tkazib, 0:3 hisobida mag‘lub bo‘lgan edi. Javob o‘yini bir haftadan so‘ng bo‘lib o‘tadi.
“Hozirda biz achinarli holatdamiz. Javob o‘yini oldidan ijobiy munosabatda bo‘lish qiyin bo‘ladi. Avvaliga Bundesligada “Xoffenxaym”ga qarshi o‘yinda uch ochko olishimiz kerak va shundan keyingina “Manchester Siti”ga qarshi javob o‘yiniga tayyorgarlik ko‘rishimiz mumkin”, — dedi Myuller o‘yindan keyingi intervyusida.
