«Buxoro» klubi bosh murabbiyi Ulug‘bek Baqoyev O‘zbekiston kubogi guruh bosqichi 1-turi doirasida «Turon»ga qarshi bo‘lib o‘tgan o‘yin (1:1) borasida o‘z fikrin bildirib o‘tdi.

«Bugungi uchrashuv kubok o‘yini edi, yaxshi tomoni shuki, bir qator yosh futbolchilarni sinash uchun ajoyib imkoniyat. Hamma guvohiga aylandi, bugun ularning harakatlari yomon ko‘rinmadi. Raqib darvozasini ishg‘ol qilish uchun imkoniyatlar ham yaratildi. Lekin bu futbol! Futbolda hushtakdan hushtakkacha mas’uliyatli bo‘lib to‘p surish kerak. Afsuski, o‘yin oxirida o‘z darvozamizdan to‘p o‘tkazib yubordik.

Yaxshi tomoni shuki, kim nimaga qodirligini bugungi uchrashuvda kuzatib oldik. Bu bizga chempionat davomida yoshlardan kimlarga e’tibor qaratishimiz kerakligini ko‘rsatdi. Guruhdan chiqish uchun hali imkoniyat bor. Durang ham natija hisoblanadi. Barcha yigitlarga rahmat. Ular borlarini berib harakat qilishdi.

So‘zim so‘ngida bizni oxirigacha qo‘llab turishgani uchun muxlislarimizga katta rahmat aytmoqchiman», — dedi Baqoyev.