Futbol bo‘yicha 20 yoshgacha bo‘lgan futbolchilar o‘rtasidagi Jahon chempionatiga Argentina mezbonlik qiladi. Bu haqda FIFA rasman ma’lum qildi.
Musobaqaning sanasi avvalroq aytilganidek, o‘zgartirilmaydi: turnir joriy yilning 20 mayidan 11 iyuniga qadar o‘tkaziladi. Qur’a tashlash marosimi 21 aprel kuni Syurixda bo‘lib o‘tadi.
Ushbu musobaqa Indoneziyada o‘tishi belgilangandi. Biroq FIFA mart oyi so‘ngida mamlakatni mezbonlik huquqidan mahrum qildi. Indoneziyaning ayrim shaharlari o‘z hududiga Isroil terma jamoasini kiritmasligini aytganidan keyin, FIFA avvaliga qur’a marosimini bekor qilgan, keyinroq Indoneziyadan mezbonlikni tortib olgandi.
Musobaqada 24 ta jamoa ishtirok etadi. Osiyo Kubogidagi g‘oliblik orqali yo‘llanmaga ega bo‘lgan O‘zbekiston U-20 terma jamoasi uchinchi savatchadan joy oladi.
Qur’a oldidan savatchalar quyidagi ko‘rinishni oladi:
Birinchi savatcha: Argentina (mezbon), Urugvay, AQSH, Fransiya, Senegal, Italiya;
Ikkinchi savatcha: Angliya, Janubiy Koreya, Yangi Zelandiya, Braziliya, Kolumbiya, Ekvador;
Uchinchi savatcha: Nigeriya, Yaponiya, O‘zbekiston, Iroq, Gonduras, Fiji;
To‘rtinchi savatcha: Gvatemala, Dominikan, Gambiya, Isroil, Slovakiya, Tunis.
