"Andijon" bugun O‘zbekiston Kubogidagi ishtirokini boshlaydi. Bilasiz, “Burgutlar” qur’aga ko‘ra “F” guruhidan joy olgan. “Andijon”dan tashqari bu guruhda “Navbahor”, “Olimpik” va “Olimpiya” jamoalari ham bor.

Kecha ushbu guruhning ilk o‘yinida “Olimpiya” o‘z maydonida “Navbahor”ga 1:4 hisobida imkoniyatni boy berdi. Bugun esa Farg‘onadagi “Istiqlol” stadionida “Andijon” Temur Kapadze ustozligidagi “Olimpik”ni qabul qiladi.

Yodingizda bo‘lsa, 3 aprel kuni mazkur jamoalar Superliganing 4-turida Toshkentdagi “Jar” stadionida o‘zaro kuch sinashishgandi. Yomg‘irli ob-havo ostida o‘tgan o‘yinda Ildar Mamatkazinning 3-daqiqada kiritgan goli evaziga “Andijon” safardan muhim uch ochko bilan qaytgan. Ushbu qarama-qarshilik bilan jamoalarning rasmiy o‘yinlardagi o‘zaro hisob-kitobi boshlangan. Ungacha bu klublar biror marta maydonda to‘qnash kelishmagan.

Shunday ekan, shu oyning o‘zidayoq endi “Andijon” va “Olimpik” ikkinchi bor yo‘llari kesishmoqdalar va bu safar O‘zbekiston Kubogida.

Eslatib o‘tamiz, mazkur bahs bugun Farg‘onadagi "Istiqlol" stadionida soat 18:00 da boshlanadi.  

“Andijon” matbuot xizmati.