Yevropa Chempionlar Ligasida chorak final o‘yinlari ortda qoldi va yarim finalga yo‘llanma olgan jamoalar nomi ma’lum bo‘ldi.

Demak, avvalroq tashlangan qur’aga ko‘ra yarim final juftliklari quyidagi ko‘rinishni oldi:

“Real Madrid” (Ispaniya) — “Manchester Siti” (Angliya)
“Milan” (Italiya) — “Inter” (Italiya)

Yarim finalning dastlabki o‘yinlari 9–10 may kunlari o‘tkazilsa, javob bahslari 16–17 may kuniga mo‘ljallangan. Final 10 iyun kuni Istanbulda o‘tkaziladi.

“Real” — “Manchester Siti”

Jamoalar ketma-ket ikkinchi mavsum o‘zaro to‘qnash kelmoqda. O‘tgan mavsumda “Real” yarim finalda “shaharliklar”ni musobaqadan chiqarib yuborgandi. Dastlabki o‘yinda ingliz klubi 4:3 hisobda g‘alaba qozongan, Madriddagi o‘yinda “Real” 3:1 hisobini qayd etgandi.

Umumiy olganda esa bu jamoalar YECHL yarim finalida uchinchi marta to‘qnash keladi. Avvalgi har ikki bellashuv ispan klubi foydasiga hal bo‘lgan.

“Qaymoqranglilar” Chempionlar Ligasi pley-offida ketmagan oltinchi marta APL klubiga duch kelmoqda. Joriy mavsum “Real” “Liverpul” (1/8 final) va “Chelsi”ni (1/4 final) taslim etdi. O‘tgan mavsumda ham “Chelsi” (1/4 final), “Manchester Siti” (1/2 final) va “Liverpul” (final) YECHLning amaldagi chempioniga ro‘baro kelgandi. “Manchester Siti” joriy mavsum pley-off bosqichida Germaniyaning “Leypsig” va “Bavariya” klublarini taslim etdi.

9 may, seshanba | 00:00
“Real Madrid” — “Manchester Siti”

17 may, chorshanba | 00:00
“Manchester Siti” — “Real Madrid”

Dastlabki o‘yin Madridda, javob bahsi esa Manchesterda bo‘lib o‘tadi.

“Milan” — “Inter”

“Milan” pley-offda “Tottenhem” va “Napoli”ni ortda qoldirgan holda shu joyga qadar yetib keldi. “Inter” esa bundan avvalgi bosqichlarda Portugaliyaning “Portu” va “Benfika” jamoalarini musobaqadan chiqarib yubordi.

Milanning ikki klubi Chempionlar Ligasi tarixida uchinchi marta o‘zaro to‘qnash keladi.

2002/03 yilgi mavsum yarim finalida har ikki o‘yin durang bilan yakunlangan (0:0, 1:1) va “rossoneri” safardagi gol evaziga finalga yo‘l olgandi. 2004/05 yilgi mavsum chorak finalida esa “Milan” dastlabki bahsda 2:0 hisobida yutgan, javob o‘yinida muxlislarning xatti-harakatlari sabab “Inter”ga 0:3 hisobida texnik mag‘lubiyat yozilgandi.

Joriy mavsum jamoalar boshqa musobaqalar doirasida uch marta o‘zaro o‘yin o‘tkazdi. A Seriya birinchi davrasida “Milan” 3:2 hisobida g‘alaba qozondi, ikkinchi davrada “Inter” minimal hisob bilan zafar quchdi. Italiya Superkubogida esa “Inter” raqibini 3:0 hisobida dog‘da qoldirdi.

10 may, chorshanba | 00:00
“Milan” — “Inter”

16 may, seshanba | 00:00
“Inter” — “Milan”