Londonning “Arsenal” jamoasi chempionlik uchun kurashda yana ochko yo‘qotib muxlislari hafsalasini pir qildi. Mikel Arteta jamoasi “Sautgempton” bilan durang o‘ynadi – 3:3.
Shunday bo‘lsa-da, "Arsenal" Premyer-ligada 10 uchrashuvdan beri mag‘lub bo‘lmayapti. So‘nggi bor “kanonirlar” 15 fevral kuni o‘z maydonida “Manchester Siti”ga yutqazgandi – 1:3. O‘shandan beri chempionlikka da’vogar bo‘lib turgan klub qatorasiga yettita o‘yinda g‘alaba qozongan va so‘nggi uchta uchrashuvda durang qayd etgan.
"Arsenal" uchun navbatdagi uchrashuv hal qiluvchi bo‘lishi mumkin, chunki jamoa "Etihad" stadionida APL chempionligi uchun kurashdagi asosiy raqib - "Manchester Siti" bilan mehmonda uchrashadi. U 26 aprelga rejalashtirilgan.
