Erik ten Xagning "MYU"dagi ilk mavsumi, umumiy olib qaraganimizda yaxshi o‘tmoqda. Ammo uning jamoasi APLda bir necha marta og‘ir mag‘lubiyatlar qabul qilib oldi. Niderlandiyalik mutaxassis jamoaga Angliya liga kubogi titulini taqdim etgan edi. Qolaversa, "qizil iblislar" ayni damda YECHL yo‘llanmasi uchun yaxshi imkoniyatga ega bo‘lib turibdi. Shunga qaramay, ayrim safar uchrashuvlari jamoaning zaif nuqtalarini ko‘rsatib qo‘ydi. Shulardan biri "Sevilya"ga uchralgan 3-0 hisobidagi mag‘lubiyatdir. Bu bahslar ten Xagga qayta qurishni davom ettirish kerak degan signal bermoqda. Quyida "MYU"ning mavsum davomidagi yirik mag‘lubiyatlari va unga jamoaning reaksiyasi qanday bo‘lgani haqida so‘z boradi.
"Brentford"ga – 4-0 (2022, avgust)
Birinchi turdagi mag‘lubiyatdan keyin butun dunyodagi muxlislar "MYU"dan jahli chiqadi. "Brentford" o‘z mehmonlarini birinchi bo‘limdagi 4 gol bilan mag‘lub etgandi. Keyingi o‘yin "Liverpul"ga qarshi bo‘ladi va unda ten xag Maguayr va Ronalduni zaxirada qoldiradi. Oqibatda, Klopp jamoasi 2-1 hisobida dog‘da qoldiriladi. Shundan keyin ketma-ket uchta o‘yinda g‘alabalarga erishilgan edi.
"Manchester Siti"ga – 6-3 (2022, oktyabr)
"MYU" qattiq sinovdan o‘tishi kerak bo‘lganida doimo hamshahari bilan to‘qnash keladi. Manchester derbisida Xoland va Foden xet-trikka erishadi. "Qizil iblislar" esa 6-3 hisobida mag‘lubiyatga uchraydi. Ushbu muvaffaqiyatsizlikka javob ajoyib edi. Keyingi, "Everton", "Tottenxem" va "Vest Xem"larga qarshi ketma-ket g‘alabalar qayd etilgan. Kazemiro ana shunday o‘yinlarda jamoa joniga oro kirgandi.
"Aston Villa"ga – 3-1 (2022, noyabr)
"Aston Villa" "MYU"ni o‘z maydonida qabul qiladi. O‘shanda birmingemliklar xavfli zona atrofida joylashgan edi. Ammo maydon egalari yangi murabbiy, Unai Emeri bilan natijalarini yaxshi tomonga o‘zgartira olgandi. Shunday qilib, 1990 yillardan beri "sherlar" ilk marta "MYU"ni taslim etadi. Ana shu o‘yin Krishtianu Ronaldu uchun so‘nggisi bo‘lgandi. Oradan ko‘p o‘tnay, u Pirs Morgan bilan intervyu qilish orqali Manchesterdagi faoliyatiga yakun yasaydi. "Aston Villa"ga mag‘lubiyatdan keyin yana shu jamoa ten Xag oldida paydo bo‘ladi. Ammo bu safar kubok o‘yinida. Shunday vaziyatda "MYU" o‘ch oladi.
"Liverpul"ga – 7-0 (2023, mart)
Chempionlikka da’vo qilayotgan jamoa, birdaniga "Enfild"da sharmandali hisob qayd etadi. Birinchi bo‘limda bitta gol ko‘rgan muxlislar, keyingisida oltitasiga guvoh bo‘ldi. Natijada, mersisaydliklar ashaddiy raqiblarini 1930 yildan beri eng og‘ir mag‘lubiyatga duchor qilgandi. Keyingi o‘yin Yevropa ligasida kechadi va unda "Real Betis" to‘sig‘i yengib o‘tiladi.
"Nyukasl"ga – 2-0 (aprel, 2023)
"Nyukasl" o‘z raqibida liga kubogidagi mag‘lubiyat uchun o‘ch olgan edi. Ikkinchi bo‘limdagi Jo Uillok va Kallum Uilsonning gollari bahs taqdirini hal qiladi. Erik ten Xag jamoasi esa allaqachon chempionlik poygasidan chiqib ketib ulgurgandi. Ha, achinarli muvaffaqiyatsizlikdan keyin, "Manchester Yunayted" bunga "Everton", "Nottingem" va "Brentford"ni yutib, javob qaytardi. Ammo "Sevilya"dan yutqiziq, muxlislar uchun og‘ir bo‘ldi. Bu voqealarning hammasi shuni ko‘rsatdiki, "Old Trafford"da mavsum bo‘yi ikki qadam oldinga, bir qadam orqaga yurilgan va ortiq bunday davom etib bo‘lmaydi. Hammasini o‘nglash uchun esa ten Xag yozda jiddiy ishlarni amalga oshirishi lozim.
ISMATOV J.
