O‘zbekiston futbol assosiasiyasi tomonidan terma jamoalar faoliyati bilan bog‘liq yaqin va uzoq muddatli loyiha hamda rejalar amalga oshirib kelinmoqda. Bugungi kunda turli yosh toifasidagi 19 ta terma jamoalarimiz mamlakatimiz va xorijda o‘quv-mashg‘ulot yig‘inlarini tashkil etib, oldinda turgan musobaqalarga tizimli tayyorgarlik ko‘rmoqda.

Bugun O‘FA rahbariyati Toshkentda yig‘in o‘tkazayotgan O‘zbekiston o‘smirlar terma jamoasining mashg‘ulotlarida ishtirok etib, murabbiylar shtabi bilan tashkil etilayotgan yig‘inlar tahlili, futbolchilarning holati va imkoniyatlari, shuningdek, yaqinlashib kelayotgan Osiyo kubogi musobaqalariga tayyorgarlik rejalari xususida suhbatlashdi.

Osiyo kubogiga reja asosida tayyorgarlik ko‘rish, Jahon chempionati yo‘llanmasini qo‘lga kiritish zarur ekanligi ta’kidlandi. Rahbariyat futbolchilarga oldinda turgan nufuzli musobaqaga bor kuch va g‘ayratlari bilan tayyorgarlik ko‘rish kerakligini aytib, ularga omad tiladi.

Ma’lumot uchun, Jamoliddin Rahmatullayev shogirdlari 25, 27 aprel kunlari yamanlik tengdoshlariga qarshi o‘rtoqlik uchrashuvlarida ishtirok etadilar.