Ўзбекистон футбол ассоциацияси томонидан терма жамоалар фаолияти билан боғлиқ яқин ва узоқ муддатли лойиҳа ҳамда режалар амалга ошириб келинмоқда. Бугунги кунда турли ёш тоифасидаги 19 та терма жамоаларимиз мамлакатимиз ва хорижда ўқув-машғулот йиғинларини ташкил этиб, олдинда турган мусобақаларга тизимли тайёргарлик кўрмоқда.
Бугун ЎФА раҳбарияти Тошкентда йиғин ўтказаётган Ўзбекистон ўсмирлар терма жамоасининг машғулотларида иштирок этиб, мураббийлар штаби билан ташкил этилаётган йиғинлар таҳлили, футболчиларнинг ҳолати ва имкониятлари, шунингдек, яқинлашиб келаётган Осиё кубоги мусобақаларига тайёргарлик режалари хусусида суҳбатлашди.
Осиё кубогига режа асосида тайёргарлик кўриш, Жаҳон чемпионати йўлланмасини қўлга киритиш зарур эканлиги таъкидланди. Раҳбарият футболчиларга олдинда турган нуфузли мусобақага бор куч ва ғайратлари билан тайёргарлик кўриш кераклигини айтиб, уларга омад тилади.
Маълумот учун, Жамолиддин Раҳматуллаев шогирдлари 25, 27 апрель кунлари яманлик тенгдошларига қарши ўртоқлик учрашувларида иштирок этадилар.
