Bugun Manchesterda Premyer-liga mavsumi peshqadamlarining o‘yini bo‘lib o‘tadi. "Manchester Siti" o‘z maydonida "Arsenal"ni qabul qiladi. Chempionlik uchun kurashda 33-turning markaziy o‘yini nihoyatda muhim: "Arsenal" 75 ochko bilan turnir jadvalida peshqadamlik qilmoqda, "Manchester Siti" "Arsenal"dan 5 ochko ortda qolmoqda, lekin zaxirasida ikkita o‘yin bor.
2016 yilning yozida Xosep Gvardiola "Manchester Siti"ga bosh murabbiy etib tayinlanganidan beri jamoalar Premyer-ligada 13 ta o‘zaro o‘yin o‘tkazishgan. "Arsenal" ularning hech birida g‘alaba qozona olmagan – 1 durang va 12 ta mag‘lubiyat.
Bu o‘yinda ham "Manchester Siti" favorit hisoblanadi. "Shaharliklar"ning g‘alaba qozonish imkoniyati 61 foiz, "Arsenal"da esa 17. Durang ehtimoli 22 foiz deb baholangan.
