Бугун Манчестерда Премьер-лига мавсуми пешқадамларининг ўйини бўлиб ўтади. "Манчестер Сити" ўз майдонида "Арсенал"ни қабул қилади. Чемпионлик учун курашда 33-турнинг марказий ўйини ниҳоятда муҳим: "Арсенал" 75 очко билан турнир жадвалида пешқадамлик қилмоқда, "Манчестер Сити" "Арсенал"дан 5 очко ортда қолмоқда, лекин захирасида иккита ўйин бор.
2016 йилнинг ёзида Хосеп Гвардиола "Манчестер Сити"га бош мураббий этиб тайинланганидан бери жамоалар Премьер-лигада 13 та ўзаро ўйин ўтказишган. "Арсенал" уларнинг ҳеч бирида ғалаба қозона олмаган – 1 дуранг ва 12 та мағлубият.
Бу ўйинда ҳам "Манчестер Сити" фаворит ҳисобланади. "Шаҳарликлар"нинг ғалаба қозониш имконияти 61 фоиз, "Арсенал"да эса 17. Дуранг эҳтимоли 22 фоиз деб баҳоланган.
