Superkompyuter APLning yakuniy jadvalini taxmin qildi. Bundan ma’lum bo‘ldiki, "Arsenal" o‘z oyog‘iga o‘zi bolta urgan. "Manchester Siti" 4-1 hisobida g‘alaba qozonish orqali, londonliklarning umidlariga yakun yasagan edi. Ushbu natijani ham hisobga olgan holda, algoritm mashinasining xulosalari, Mikel Arteta jamoasi uchun o‘ta achinarli bo‘ldi. "Shaharliklar" ayni damda "Arsenal"dan 2 ochko kam to‘plagan holda ikkinchi o‘rinni band etgan. Ammo Gvardiola jamoasida ikkita zaxiradagi o‘yin mavjud.
Angliyaning amaldagi chempionlari YECHL doirasida yarim finalga yetib kelgan. Ularni oldinda "Real" to‘sig‘i kutib turibdi. Angliya kubogi finali ham manchesterliklarsiz o‘tmaydi. U yerda ikki qo‘shnilar, "MYU" va shaharning "moviy" tarafi to‘qnash keladi. Shunday qilib, "Manchester Siti" joriy mavsumda trebl qayd etish uchun qulay imkoniyat hosil qildi. Superkompyuter esa ularni allaqachon APLda chempion deb hisoblamoqda. Pep Gvardiola jamoasi 38 turdan keyin ikkinchi o‘rindagi "Arsenal"dan 5 ochko oldinda mavsumni yakunlaydi.
Raqamli qurilmaning taxminlarida aytilishicha, kuchli to‘rtlik hozirgi ko‘rinishida bo‘ladi. Ya’ni, "Nyukasl" va "Manchester Yunayted" mavsum yakunida Chempionlar ligasiga yo‘llanmani qo‘lga kiritadi.
"Liverpul"ning yaqin orada tiklangan sport formasi esa jamoaga katta yordam beradi deb hisonlanmoqda. Bu orqali mersisaydliklar beshinchi o‘ringacha ko‘tarilib olib, Yevropa ligasi yo‘llanmasini naqd qiladi. Ikkinchi YEL "chipta"si "Brayton" tomonidan egallanishi ehtimol qilingan. Konferensiyalar ligasiga esa "Tottenxem" chiqishga muvaffaq bo‘ladi.
APLning eng pastki sohasida zichlik ancha yuqori. Taxminlarga tayanilsa, "Sautgempton" qolgan o‘yinlar mobaynida yana olti ochko jamg‘ara oladi xolos. Bu esa "avliyolar"ning hozirgi pozisiyasida qolaverishini anglatadi. "Everton" hali ham Chempionshipga ravona bo‘ladiganlar safidan chiqa olmadi. Xususan, mersisayd klubi mavsumni 19 o‘rinda, 33 ochko bilan yakunlaydi. Bu esa APL uchun yetarli emas albatta. Bashoratda uchinchi baxti qaro jamoa nomi ham aniq aytilgan. Unga ko‘ra, "Nottingem Forest" klubi bir mavsumdan keyin elita bilan xayrlashadi. "O‘rmonchilar" 38 turda 34 ochko jamg‘arib, quyiga ravona bo‘ladi. Ulardan bir ochko ko‘p to‘plagan "Lids" esa ligada jon saqlab qolishi aytilgan.
So‘nggi tur natijalari bizga shunday o‘zgarishlarni taqdim etgan edi.
ISMATOV J.
