"Tottenxem" klubi hujumchi Xarri Keynni jamoada saqlab qolish uchun mashaqqatli ishga tayyorlanmoqda.

Hujumchining shartnomasi bir yilu ikki oydan keyin tugaydi va boshqa klublar uni shu yozda arzonlashtirilgan narxda sotib olmoqchi. Keynning o‘zining rejalari hozircha noma’lum, "Tottenxem" esa 29 yoshli futbolchini u bilan shartnomani uzaytirish orqali o‘z safida saqlab qolmoqchi.

Jurnalist Grexem Beylining yozishicha, “shporlar” rahbariyati “Chelsi”ni kelasi mavsumda Maurisio Pochettino boshqarsa, angliyalik yulduzga da’vogarlar ro‘yxatiga tez orada "aristokratlar"ning ham qo‘shilishini kutmoqda.

Ayni damda Transfermarkt portali tomonidan 90 million yevroga baholangan Keynga asosiy davogarlar "Manchester Yunayted", "PSJ" va "Bavariya" bo‘lib turibdi.