O‘zbekistonlik mutaxassis No’mon Hasanov Tojikistonning «Xo‘jand» klubi bosh murabbiyi etib tayinlandi.

O‘tgan haftada «Xo‘jand» jamoasi Rustam Xo‘jayev boshchiligidagi murabbiylar shtabini iste’foga chiqargandi. Hasanov esa bo‘sh qolgan lavozimni egalladi.

No’mon Hasanov futbolchilik faoliyati davomida «Paxtakor», MHSK, «Rubin» (Qozon), «Do‘stlik», «Traktor» (Toshkent), «Qo‘qon-1912» va «Nasaf» klublari safida to‘p tepgan. Shuningdek, u O‘zbekiston terma jamoasi tarkibida 23 o‘yinda ishtirok etib, 4 gol muallifiga aylangan. Murabbiylik faoliyatini boshlagach esa «Paxtakor», «Qo‘qon-1912» va «Navbahor» klublarida ishladi.

No’mon Hasanov o‘tgan mavsumda Tojikistonning «Istaravshan» jamoasini boshqargandi.

«Xo‘jand» joriy mavsumni u qadar muvaffaqiyatli boshlay olmadi. Jamoa 6 o‘yinda bor-yo‘i 7 ochko jamg‘arib, jadvalda 8-pog‘onani egallab turibdi. Ammo klub peshqadamdan 4 ochko ortda qolmoqda, xolos. No’mon Hasanovdan esa jamoadagi vaziyatni o‘nglashi talab etiladi.