Ma’lumki, yaqinda “Andijon” jamoasi Farg‘onada “Neftchi”ga qarshi nazorat uchrashuvida ishtirok etdi.
Ushbu bellashuvning ikkinchi bo‘limida maydonga tushgan jamoa sardori Ildar Mamatkazin to‘p uchun kurashlarning birida yuz qismidan jarohat oldi. Amalga oshirilgan tibbiy tekshiruvlar natijasida futbolchimizga jarrohlik amaliyoti zarur ekanligi aniqlandi.
"Jamoamiz shifokorining ma’lum qilishicha, yuz qismi sohasining o‘ng yanoq suyagining ichkariga botib sinishi bilan tashxis qo‘yildi va Andijon viloyati “Sog‘lom Avlod” xususiy shifoxonasida yuz jarrohlik bo‘limida 2 may kuni operasiya amaliyoti o‘tkazildi.
Shuni alohida ta’kidlash lozimki, operasiya muvaffaqiyatli o‘tdi. Hozirda futbolchimizning holati yaxshi.
Bu borada Mamatkazin shunday dedi: “Xudoga shukr, operasiya ko‘ngildagidek o‘tdi, o‘zimni yaxshi his qilyapman. Shu kunlarda shifoxonadan chiqaman. Meni qo‘llab-quvvatlagan barchaga minnatdorchiligimni bildiraman” - deyiladi "Andijon" klubining matbuot xizmati tomonidan berilgan bayonotda.
